Marko 1

₁Kadia e Nevi Viasta katar o Jesus Kristo, Šiav le Devlesko. ₂Sar si ramome ande o Esai, profeto:

₃Si o hango kudalesko kai tsipil ande e pusta:

₄O Jono avilo, bolelas ande e pusta, ai phenelas pa o bolimos le keimasko, te aven jertime le bezexa.

₅Sa o them ande e Judea ai sa o narodo ande o Jerusalem žianas paša leste; ai, puřinas penge bezexa, bolenas pe lestar ande o pai o Jordan.

₆O Jono sas pe leste jekh tsolo anda o bal la gumulako, ai jekh prastia mortsiaki krugom o prašav. Vo xalas grastoře ai avdjin sirbato. ₇Vo delas duma, phenelas: Avel pala mande kudo kai si mai zuralo mandar, ai me či sim harniko te bangiuvav te putrav leske doria le papučenge. ₈Me, bolav tumen ande o pai; vo, bolela tumen ande o Svinto Duxo.

₉Ande kudia vramia, o Jesus avel anda o Nazaret ande e Galilea, ai boldias les o Jono ande o Jordan. ₁₀Sar vo anklelas avri anda o pai, vo dikhlias ke o čeri puterdiol, ai o duxo vulel pe leste sar jekh gulumbo. ₁₁Ai jekh hango ašundiol anda o čeri, phenel kakala vorbi: Tu san muřo Šiav kai kamav tu but, ande tute me thodem sa muři dragostia.

₁₂Strazo, o Duxo spidias le Jesus ande e pusta, ₁₃Kai vo sas ande e pusta štar-var-deš dies, te zumavel les o Satan. Vo sas le sirbatone žigeniensa, ai le andželi služisarde les.

₁₄Pala ke o Jono sas dino ka e kris, o Jesus gelo ande e Galilea, phenelas e Laši Viasta le Devleski.

₁₅Vo phenelas: E vramia si gata, ai e amperetsia le Devleski si paše. Kein tume, ai patian tume ka e laši viasta.

₁₆Sar vo nakhelas pe o berego la mariako katar e Galilea, vo dikhlias le Simon ai le Andreas, phral le Simonosko, kai šiude jekh setka ande e maria; ke von sas mašiaria.

₁₇O Jesus phenel lenge: Aven mansa, ai me kerava anda tumende t'astaren le manušen.

₁₈Strazo, von mukle penge setki, ai gele pala leste.

₁₉Gelo tsiřa mai dur, vo dikhlias le Jakob, šiav katar o Zebedeo, ai le Jono, lesko phral, kai, vi von, sas ande jekh čuno ai lašiarenas le setki. ₂₀Strazo, vo akharel le; ai, mukle penge dades o Zebedeo ande o čuno le butiarensa, gele pala leste.

₂₁Von gele ande o Kapernaum. Ai, o sabato, o Jesus dias angla savořende andre ande e khangeri židovitsko, ai vo sikiarelas. ₂₂Lenge sas šodo so vo sikiarel; ke vo sikiarelas sar t'avel les zor, ai na sar le zakonaria.

₂₃Arakhadilias ande lengi khangeri židovitsko jekh manuš kai sas les jekh duxo nasul, ai vo tsipil: ₂₄So si maškar amende ai tute, Jesus anda o Nazaret? Tu avilian te xasares amen. Me žianav kon san tu: o Svinto le Devlesko.

₂₅O Jesus daravel les, phenelas: Aš, ai ankli avri anda kado manuš.

₂₆Ai o duxo nasul anklisto avri anda kudo manuš, isdraias les pria zurales, ai phurdias baro tsipimos. ₂₇Savořen lias len e dar, kadia ke pušen jekh kavrestar: So si kadia? Jekh nevo zakono! Vo porončil zorasa inke pe le duxuri nasul, ai von patian lesko mui!

₂₈Ai lesko vestimos gelo strazo ande sa le riga krugom e Galilea.

₂₉Sar anklen avri anda e khangeri židovitsko, von gele le Jakobosa ai le Jonosa ka o kher le Simonosko ai le Andreasko. ₃₀E sakra le Simonoski sovelas nasvali; ai strazo dine duma pa late ka o Jesus. ₃₁Vo pašilo, vo vazdias la, lias la vastestar, ai strazo o tatimos muklias la. Porme voi služisardias len.

₃₂E riat, kana pelo tele o kham, andine leske sa le nasvalen ai le bengailen. ₃₃Ai sa o foro sas kjidino angla lesko vudar. ₃₄Vo sastiardias bute ženen kai sas le sako fialo nasvalimos; vo vi mai dias avri but duxuri nasul, ai vo či mukelas le duxuri te den duma, ke vo žianelas le.

₃₅Karing e diminiats žikin inke sas pria tamlo, vo uštilo, ai anklisto avri te žial ande jekh than pusto, kai řudjil. ₃₆O Simon ai kudala kai sas lesa gele te roden les. ₃₇Ai, kana arakhle les, von phenen leske: Sa roden tu.

₃₈Vo del le palpale: Žias pe kaver than, ande le gava paše, eta te dav duma vi kothe; ke pala kudia me avilem avri.

₃₉Ai vo gelo te del duma ande le khangeria židovitsko, ande sa e Galilea, ai vo gonil le demonon.

₄₀Jekh žiungalo nasvalo avel leste; ai, šiudias-pe pe čangende, vo phenel leske milasa: Te kamesa, tu šai vužares man.

₄₁O Jesus, lias les e mila, thodias o vast, asbadias les, ai phenel: Me kamav, av vužio.

₄₂Strazo o nasvalimos muklias les, ai vo areslo vužio. ₄₃O Jesus tradias les strazo, zurale poronkonsa,

₄₄ai vo phenel leske: Le tu sama te na phenes khanči khanikaske; numa žia te sikaves tu ka le raša, ai de pala tjiro vužimos so o Moše phendias, eta t'avel lenge marturo.

₄₅Numa kudo manuš gelotar, vo thodias pe te tsipil opre le dieli ai te puřil, kadia ke o Jesus naštisardias mai te del andre ande jekh foro, vo bešelas avri, ande le thana pusti, ai avenas leste pa sako rig.