Marko 15

₁De diminiats, le bare raša den pe duma le puranensa ai le zakonariensa, ai sa la krisasa e židovitsko. Pala ke phangle le Jesus, von andine les, ai dine les ka o Pilato. ₂O Pilato pušel les: San tu o amperato le Židovongo?

O Jesus del les palpale: Tu phenes.

₃Le bare raša thodine pe leste but doš. ₄O Pilato mai pušel les: Či des tu khanči anglal? Dikh ande sode dieli von phenen pe tute.

₅Ai o Jesus či mai del khanči palpale, so si šodo le Pilatoske.

₆Ka sako prasniko, vo mukelas jekhe řobos, kudales kai mangel o narodo. ₇Sas ande e temnitsa jekh kai bušol Barabas peske čorensa pala jekh mudarimos kai von kerde ande jekh buntuimos. ₈O narodo, anklen karing o Pilato, thode pe te mangen so sas les o zakono te del le. ₉O Pilato del len palpale: Kamen tume te mukav tumenge le amperatos le Židovongo?

₁₀Ke vo žianelas ke naročno le bare raša dinesas les. ₁₁Numa le birevia katar le raša vazden o narodo, eta ke o Pilato te mukel lenge mai mišto le Barabas. ₁₂O Pilato, mai lias e vorba, phenel lenge: So kamen tume te kerav anda kudo kai tume akharen o amperato le Židovongo?

₁₃Von mai tsipin: Amblav les pe o trušul!

₁₄O Pilato phenel lenge: Če nasul kerdias vo?

Ai von tsipin mai zurales: Amblav les!

₁₅O Pilato, kamlias te kerel so mangelas o narodo, muklias lenge le Barabas; ai, pala ke thodias te maren le Jesus la řaiasa, vo dias les lenge t'amblaven les pe o trušul.

₁₆Le ketani ningerde le Jesus andre ande le vladorosko kher, si kudia, kai kjiden pe, ai von kjidine sa le ketanen. ₁₇Von thode pe leste jekh bunda loli, ai thode pe lesko šero jekh kurona kanřengi, kai von khuvde. ₁₈Porme thode pe te den les pozdraimos: Unpači, amperato le Židovongo!

₁₉Ai von malaven lesko šero jekha řaiořasa, čungarden pe leste, ai šiudine-pe pe čangende, von bangile angla leste. ₂₀Pala kudia te asaie lestar, von line pa leste e bunda loli, ai ningerde les te karfon les pe o trušul.

₂₁Von thodine zor te ningerel o trušul jekhe manušes kai nakhelas kai avelas pa le kimpuri, o Simon anda e Sirena, dad katar o Aleksander ai o Rufus. ₂₂Ai von ningerde le Jesus ande o than kai bušol Golgota, so si kudo, šero manušesko. ₂₃Von dine les te pel mol hamime mirosa, numa vo či pilias. ₂₄Von karfode les pe o trušul, ai hulade leske tsalia, khelde pe te žianen so sako šai lel. ₂₅Sas o iniato časo, kana von amblade les. ₂₆O ramomos phenelas pa soste vo si dino strafo, sas kakala vorbi: O amperato le Židovongo. ₂₇Von amblade lesa dui řobon, jekh pe leski čači, ai o kaver pe leski stingo. ₂₈Kadia areslo so phendias o Ramomos: Vo sas thodino maškar le čor.

₂₉Kai nakhen prasan les, ai miškin o šero, phenenas: Ei! tu kai phařaves o templo, ai kai uštiaves les ande le trin dies, ₃₀skipisavo tu korkořo, vuli pa o trušul!

₃₁Le bare raša vi von, le zakonariensa, asanas maškar pende, ai phenenas: Vo skipisardias le kavren ai naštil te skipil pe vo korkořo! ₃₂Ke o Kristo, o amperato anda o Israel, te vulel akana pa o trušul, eta ke ame te dikhas ai ame te patias!

Kudala kai sas amblade lesa vi von prasanas les.

₃₃O miažitso avilo, sas tuniariko pe sa e phuv, ži ka o trito časo. ₃₄Ai ka o trito časo, o Jesus tsipisardias jekh glasosa zurale: Eloi, Eloi, lama sabaxthani? kudia bušol: Muřo Dad, Muřo Dad, sostar muklian ma tu?

₃₅Uni anda kudala kai sas kothe, ašunde leste, phenenas: Eta, vo akharel le Elia.

₃₆Ai jekh anda lende našlo te pherel jekh dirza šut, ai, astardias la pe jekh kaštořo, dias les te pel, phenelas: Muken, dikhasa ke te si o Elia te vuliarel les.

₃₇Numa o Jesus, phurdias jekh baro tsipimos, getosailo.

₃₈E zanaveska katar o templo šindili ande donde, de opral ži tele. ₃₉O fitsiri kai sas angla o Jesus, dikhlias sar vo getosailo, phenel: Čačimasa, kado manuš sas o Šiav le Devlesko.

₄₀Mai sas žiuvlia kai dikhenas de dural. Maškar lende sas e Maria anda e Magdala, e Maria, dei katar o Jakob o terniar ai katar o Jose, ai e Salome, ₄₁kai žianas pala leste ai služinas les kana sas ande e Galilea, ai but kaver kai ankliste lesa ande o Jerusalem.

₄₂E riat aresli — o dies kai lašiarenas o sabato. ₄₃Areslo o Josef anda o Arimate, manuš kai denas les pativ ande e kris e bari, kai vi vo ažiukerelas e amperetsia le Devleski. Vo tromailo te žial karing o Pilato, te mangel o stato le Jesusosko. ₄₄O Pilato sas leske šodo ke mulo kadia sigo, akharel kadales kai si baro pe le jekh šel ketani, ai pušel lestar te mulo de dumult. ₄₅Kana ašundias lestar ke si kadia, vo dias o stato ka o Josef. ₄₆Ai o Josef, kjindias jekh paplano, vuliardias le Jesus pa o trušul, phanglias les ande o paplano, ai thodias les ande jekh groapoševo šindo ande jekh stanka bařeski. Porme spidias jekh bař angla o groapoševo. ₄₇E Maria anda e Magdala, ai e Maria, dei le Joseski, dikhle kai thodine les.