Marko 9

₁Vo mai phenel lenge: Me phenav tumenge čačimasa, uni anda tumende kai si kathe či merena, mai angle te dikhen e amperetsia le Devleski avel zorasa.

₂Šov dies pala kudia, o Jesus lias pesa le Petri, le Jakob ai le Jono, ai ningerdias le ferdi len rigate pe jekh baro plai. Vo pařudisailo angla lende; ₃leske tsalia aresen te strefian, kasave parne ke nai sapui pe e phuv te šai parniarel kadia. ₄O Elia ai o Moše sikadile lenge, denas duma le Jesusosa. ₅O Petri, lias e vorba, phenel le Jesusoske: Rabi, mišto ke ame sam kathe; vazdas trin tseři, jekh tuke, jekh le Mošeske, ai jekh le Eliaske.

₆Ke vo či žianelas so te phenel, e dar lias len. ₇Jekh nuvero avilo te garavel len, ai anda o nuvero anklel jekh hango: Kado si muřo Šiav o mai drago; ašunen leste!

₈Strazo le vortača dikhen krugom pendar, ai von dikhel ferdi le Jesus korkořo lensa.

₉Sar von vulenas pa o plai, o Jesus del len poronka te na phenen khanikaske so von dikhle, žikin či o Šiav le manušesko živindila anda le mule.

₁₀Von ninkerde kudia vorba, pušenas jekh avres so si kudia ke živindil anda le mule.

₁₁Le vortača pušen les kadia: Sostar le zakonaria phenen von ke o Elia trubul te avel angla savořende?

₁₂Vo del len palpale: O Elia avela o mai angluno, ai thola sa le dieli palpale. Ai sostar si ramome pa o Šiav le manušesko ke trubul te kjinuil but ai avela vuřitsime? ₁₃Numa me phenav tumenge ke o Elia avilo, ai ke von kerde anda leste sar von kamle, sar sas ramome pe leste.

₁₄Kana aresle paša le vortača, von dikhle krugom lendar jekh baro narodo, ai le zakonaria den duma lensa. ₁₅Sa o narodo, kana dikhle les, čudinisaile but ai našle karing leste te den les pozdraimos. ₁₆Vo pušel len: Pe soste den duma tume lensa?

₁₇Ai jekh manuš anda o narodo del les palpale: Birevo, me andem paša tute muře šiaves, kai si ande leste jekh duxo muto. ₁₈Ande varesavo than kai lel les, vo šiudel les tele pe e phuv; e glata si le spuma ande o mui, grintsil le dand, ai avel sastruno. Me řudjisailem ka tjire vortača te gonin o duxo, ai von naštisarde.

₁₉Vitsa kai či patial, phenel lenge o Jesus. Ži kana avava me tumensa? Ži kana ninkerava me tumen? Anen les mange.

₂₀Andine le leske. Ai strazo ke o duxo dikhlias le Jesus, o duxo miškil les zurales, vo pelo pe e phuv, ai amboldas pe spumasa ande o mui. ₂₁O Jesus pušel katar o dad: De sode vramia si leske kadia?

De tsinořara, del vo palpale. ₂₂Ai butivar o duxo šiudias les ande e jag ai ande o pai te mudarel les. Numa, te šai daštis tu te keres vareso, aidi t'ažutisares ame, t'avel tuke mila amendar.

₂₃O Jesus phenel leske: Te šai daštis! Sa šai daštil kudo kai patial.

₂₄Strazo o dad la glatako tsipil: Me patiav! aidi t'ažutisares ma te patiav mai but!

₂₅O Jesus, dikhlias ke kjidel o narodo, daravel le duxo nasul, ai phenel leske: Duxo muto ai kašuko, me dav tu ordina, ankli avri anda kadia glata, ai na mai de andre.

₂₆Ai vo anklisto avri, tsipilas, ai miškilas pe pria but. E glata aresli sar mulo, kadia ke but phenenas ke mulo. ₂₇Numa o Jesus lias les vastestar, uštiadias les. Ai vo bešel pe punřende.

₂₈Kana o Jesus gelo ande o kher, leske vortača pušen les korkořo. Sostar naštisardiam ame te gonisaras kudo duxo?

₂₉Vo phenel lenge: Kasavo šai anklel avri ferdi katar o řudjimos.

₃₀Von geletar kothar, ai nakhle pa e Galilea. O Jesus či kamelas te žianel o narodo kai sas. ₃₁Ke vo sikiarelas peske vortakon ai vo phenel lenge: O Šiav le manušesko avela dino ande le vast le manušenge; von mudarena les, ai, trin dies pala ke avela mulo, vo živindila.

₃₂Numa le vortača či hatiarenas kudia vorba, ai daranas te pušen les.

₃₃Von aresle ande o Kapernaum. Kana von dine andre ande o kher, o Jesus pušel le: Pa soste denas tume duma pe e vurma?

₃₄Numa von bešen mutsi, ke pe e vurma von denas duma te žianen kon si o mai baro. ₃₅Atunči vo bešlo tele, akhardias le deš-u-don, ai phenel lenge: Te kamela varekon t'avel o mai angluno, vo avela o mai paluno savořengo ai e sluga savořengi.

₃₆Ai lias jekh tsinoři glata, thodias les maškar lende, ai lias les ande peski angali, vo phenel lenge: ₃₇Varekon kai lela ande muřo anav jekhes anda kadala tsinoře glati man lel vo; ai kon-godi lel ma lel na man, numa kudales kai tradias ma.

₃₈O Jono phenel leske: Birevo, ame dikhliam jekhe manušes kai gonil le demonon ande tjiro anav; ai ame či mukliam les, ke vo či avel amensa.

₃₉Muken les te kerel, del palpale o Jesus, ke nai khonik kai, kerela jekh čudenia ande muřo anav, šai te del vo strazo nasul duma pa mande. ₄₀Kon nai pe amende si amensa. ₄₁Ai ke varekon dela tumen te pen jekh taxtai pai ande muřo anav, ke tume san le Kristoske, me phenav tumenge čačimasa, vo či xasarela khanči.

₄₂Numa, te si varekon ke rimol jekhes anda kadala tsinoře kai patian pe mande, mai mišto avela leske te thon leske jekh bař ašavesko pe e koř, ai te šiuden les ande e maria. ₄₃T'avela ke tjiro vast si tuke ke šai peres pala leste, šin les; mai mišto tuke t'aves jekhe vastesa ande o traio, sar t'aven tu le dui vast ai te žias ande e pařa, [ande e jag kai či merela šoha, ₄₄kai o kjermo či merel, ai kai e jag či merel]. ₄₅T'avela tjiro punřo ke si tuke te peres, šin les; mai mišto avela tuke t'aves bango ande o traio, ke te si tu le dui punře ai t'aves šiudino ande e pařa, [ ₄₆kai o kjermo či merel, ai kai e jag či merel.] ₄₇Ai t'avela tjiri jakh ke si tuke te peres, ankalav la, mai mišto tuke te des andre ande e amperetsia le Devleski jekha jakhasa, ke t'aven tu dui jakha ai t'aves šiudino ande e pařa, ₄₈kai o kjermo či merel, ai kai e jag či merel. ₄₉Ke sako manuš avela londiardo ande e jag.

₅₀O lon, si jekh diela laši; numa t'avela o lon ke nai les gusto, sar avena tume te londiaren les pale? T'avel tumen lon ande tumende, ai t'aven patiasa jekh avresa.