1Phirimaske gjili.
Baro Del, de tu gindimos ka o David,
Ai sa leske nekazuri!
2Vo solaxadias ka o Baro Del,
Vo phendias kudia ka o zuralo Jakob:
3Me či dava andre ande e tseřa kai me bešavas,
Me či ankliava pe o than kai me hodinivas,
4Me či dava lindri ka muře jakha,
Či te kukuiv muře prečani,
5Žikin či arakhava jekh than le Bare Devleske,
Jekh kher la zorake katar o Jakob.
6Eta, ame ašundiamas ke den duma pa kudia ande o Efrata,
Ame arakhliam la ande le kimpuri o Jar.
7Aven ka lesko kher,
Klonisavas angla leski skara!
8Ušti, Baro Del, aidi ka o than kai hodinis,
Tu ai o arko tjire amperatisko!
9Ke tjire raša te len pe pende e kris,
Ai ke te tjire čače phurden tsipimata veseli!
10Pala o David, tjiri sluga,
Na de palpale tjire svintos!
11O Baro Del solaxadias o čačimos ka o David,
Vo či mai avela:
Me thava pe tjiro skamin amperatisko jekh fruta anda tjire peřa.
12Te len sama tjire šiave muřo mothaimos
Ai muře zakonuri kai me sikiarav le,
Vi lenge šiave pe sakda
Bešena pe tjiro skamin amperatisko.
13E, o Baro Del alosardias o Sion,
Kai kamlias kothe te bešel:
14Si muřo than kai hodiniv pe sakda;
Me bešava kothe, ke me kamlem les;
15Me svintsova lesko xamos,
Me pravarava manřesa leske proston;
16Me thava o skipimos pe leske raša,
Ai leske čače phurden tsipimata veseli.
17Kothe vazdava e zor le Davidoski,
Me lašiarava jekh lampo muře svintoske.
18Me thava lažiav pe leske dušmaia,
Ai pe leste strefiala leski kurona.
