Psalmo 139

Baro Del! tu zumaves ma ai tu žianes ma

₂Tu žianes kana me bešav ai tu žianes kana me uštiav,

Tu de dural des ande muřo gindo;

₃Tu žianes kana me phirav ai tu žianes kana me sovav,

Ai tu žias ande sa muře vurmi.

₄Ke e vorba nai pe muři šib,

Ke inke, o Baro Del! tu žianes la sa.

₅Tu terdios krugom ma palal ai anglal,

Ai tu thos tjiro vast pe mande.

₆Jekh godiaverimos kadia šukar si opral kai naštiv t'astarav les,

Voi si pria opre te šai lav la.

₇Kai šai žiava me dur katar tjiro duxo,

Ai kai našava me dur katar tjiri fatsa?

₈T'ankliava me ande le čeri, tu san kothe;

Te me sovava kai si le mule, eta tu san kothe.

₉Te lava me le phaka le dieseske,

Ai ke te žiav te bešav ka o gor la mariako,

₁₀Vi kothe tjiro vast ningerela ma.

Ai tjiro čačo lela ma.

₁₁Te me phenava: Amburim o tuniariko garavela ma,

Le vedaria keriona riat krugom mandar;

₁₂Inke le tuniariči nai tuniariko tuke,

E riat strefial sar o dies,

Ai le tuniariči sar e vedaria tuke.

₁₃Tu kerdian muře prašave,

Kai khuvdian ma ande o peř muřa dako.

₁₄Me luvudiv tu ke sim jekh kreatura kadia šukar.

Tjire butia si drago,

Ai muřo duxo žianel les mišto.

₁₅Muřo stato nas garado angla tute,

Kana tu kerdian me ande jekh than garado.

Khuvdo ande e hunia la phuviaki.

₁₆Kana me simas jekh kotor bi goresko, tjire jakha dikhenas ma;

Ai pe tjiri kliška sas sa ramome,

Le diesa kai sas mange thodine,

Angla savořende t'avel jekh anda lende.

₁₇Ke tjire ginduri, o Del, maziol mange ke či das pe lengo gor!

Ke sode si but!

₁₈Te gjinava le, von si mai but sar le simintsi la kisaiake.

Me uštiav, ai me sim inke tusa.

₁₉O Del, te šai mudares tu le nasules!

Manuš ratenge, durion mandar!

₂₀Von den duma pa tute sar jekh manuš nasul,

Von len tjiro anav te xoxaven, von, tjire dušmaia!

₂₁Baro Del, či avela man vuřitsimos pe kudala kai vuřitsin tu,

Griatsia pe kudala kai ušten pe tute?

₂₂Me vuřitsiv le anda jekh vorta vuřitsimos;

Von si mange dušmaia.

₂₃Zumav ma, o Del, ai prinžiar muřo ilo!

Dikh kon sim, ai prinžiar muře ginduri!

₂₄Dikh te sim pe jekh vurma čoři,

Ai ninger ma pe e vurma kai si pe sakda!