Psalmo 18

₂Me kamav tu, o Baro Del, muři zor!

₃Baro Del, muřo bař, muřo armia, muřo skipitori!

Muřo Del, muřo bař, kai arakhav te garadiovav!

Muřo fedevo, e zor kai skipil ma, muřo than kai garadiovav!

₄Me tsipiv mange: luvudime t'avel o Baro Del!

Ai me sim skipime katar muře dušmaia.

₅Le phanglimata le merimaske sas krugom mandar,

Ai le paiořa le phařaimaske dine man dar;

₆Le phanglimata katar o groapoševo sas mandar krugom,

Le sletki le merimaske linesas ma.

₇Ande muřo nekazo, mai akhardem le Bare Devles,

Me tsipisardem pe muřo Del;

Anda peski avlin, vo ašundias muřo hango,

Ai muřo tsipimos avilo angla leste ka leske kan.

₈E phuv miškisaili ai isdraias,

Le plaia telal isdrale,

Ai von miškisaile, ke sas pe leste e xoli.

₉Anklelas thuv anda lesko nakh,

Ai jekh jag kai xal anklelas anda lesko mui;

Šiudenas pe avri angara phabarde.

₁₀Vo teliarelas le čeri, ai vo vulisto:

Sas jekh thulo thuv tela leske punře.

₁₁Vo sas anklisto pe jekh xerubo, ai vo vuriaras,

Vo vuriaras pe le phaka la balvaliake.

₁₂Sas pe leste paia tuniariči ai tuniariči nuveria.

Leski tseřa krugom lestar,

₁₃Katar andar o šukar barimos kai žialas angla leste skipinas pe le nuveria,

Šiudenas e babitsa ai angara phabarde.

₁₄O Baro Del del řondieto ande le čeri,

O Mai Vučo kerel t'ašundiol lesko hango,

La babitsasa ai le angara jagake.

₁₅Vo šiudel peske sulitsi ai phařavel muře dušmanon,

Vo butiarel o řondieto ai kerel te xasaren o drom.

₁₆O than le paiengo sikadiol,

E phuv la lumiaki anklisti avri,

Sar daraves amen, o Baro Del!

Katar o bašimos kai phurdel tjiro nakh,

₁₇Vo thol pesko vast de-opral, vo lel ma,

Vo lel ma avri anda le bare paia;

₁₈Vo skipil ma katar muřo zuralo dušmano,

Katar muře dušmaia kai sas mai zurale mandar.

₁₉Von dinesa pe mande o dies kai simas nekežime;

Numa pe o Baro Del me ninkerdem.

₂₀Vo puterdias mange,

Vo skipisardias ma, ke vo kamelas ma.

₂₁O Baro Del kerdias sar me sim vorta,

Vo dias ma sar si vuže muře vast;

₂₂Ke me lem sama le vurmi le Bare Devleske,

Ai me či simas došalo karing muřo Del.

₂₃Sa leske ordini sas angla mande,

Ai me či dem rigate katar leske zakonuri.

₂₄Me simas bi došalo angla leste,

Ai me la ma sama katar muři bezex.

₂₅Kadia o Baro Del dias ma sar me sim vorta,

Sar si vuže muře vast angla leske jakha.

₂₆Kudalesa kai si lašio tu san lesa lašio,

Le manušesa kai si vorta tu keres sar si vorta,

₂₇Kudalesa kai si vužio tu san lesa vužio,

Ai le vuřitsosa tu keres lesa sar si vuřitsoso.

₂₈Tu skipis le narodos kai keil pe,

Ai tu peraves le dikhimata barimatange.

₂₉E, tu keres te strefial muři vedaria;

O Baro Del, muřo Del, strefiarel muře tuniariči.

₃₀Tusa šiuda ma pe jekh trupa armime,

muře Devlesa nakhav jekh zido.

₃₁Le vurmi le Devleske si vorta,

E vorba le Bare Devleski si zumadi;

Vo si jekh fedevo kudalenge kai den pe leske.

₃₂Ke kon si Del, te na avela o Baro Del,

Ai kon si jekh bař, te na avela amaro Del?

₃₃O Del phandel ma la zorasa,

Ai vo ningerel ma ande e vurma vorta.

₃₄Vo kerel t'aven muře punře sar o čerbo,

Ai vo thol ma pe muře thana opre.

₃₅Vo sikiarel muře vast te marav ma,

Ai muře vast tsirden e sulitsa abčineski.

₃₆Tu des ma e fedevo tjire skipimasko,

Tjiro čačo vast ninkerel ma,

Ai me areslem baro katar tjiro mištimos.

₃₇Tu buvliares e vurma tela muře pasuri,

Ai muře punře či miškin.

₃₈Me našav pala muře dušmaia, astarav le,

Ai me či avav palpale angla savořende te bilavav le pa e phuv.

₃₉Me phagav le, ai von naštin te mai ušten;

Von peren tela muře punře.

₄₀Tu phandes ma la zorasa te marav ma pe lende,

Tu bangiares tela mande muře dušmanon.

₄₁Tu keres t'ambolden o dumo muře dušmaia angla mande,

Ai me mudarav kudalen kai vuřitsin ma.

₄₂Von tsipin, ai khonik naštil te skipil le!

Von tsipin pe o Baro Del, ai či del le anglal!

₄₃Me inčarav le sar e pulberia kai ningerel e balval,

Me inčarav le sar e čik le dromengi.

₄₄Tu skipis ma katar tsiden-pe pe mande o narodo;

Tu thos ma ka o šero le themengo;

Jekh narodo kai me či žianav si tela mande.

₄₅Von patian ma ka e mai angluno ordina,

Le šiave le streinonge řezgin ma;

₄₆Le šiave le streinonge zalin,

Von isdran avri anda penge armi.

₄₇Te trail o Baro Del, ai svintsime t'avel muři stanka!

Ke o Del muře skipimasko t'avel vestime,

₄₈O Del kai si te pokjinel ma,

Kai thol tela muřo vast le narodon,

₄₉Kai skipil ma katar muře dušmaia!

Tu uštiaves ma opral pa muře dušmaia,

Tu skipis ma katar o manuš nasul zuralo.

₅₀Sa anda kudia vestiva tu maškar le thema, o Baro Del!

Ai me gjilabava te vestiv tjiro anav.

₅₁Vo del bare skipimata ka pesko amperato,

Ai leske si mila katar pesko svinto,

Ka o David, ai so avela lestar, pe sakda.