1Ka o birevo kudalengo kai gjilaben. Psalmo le Davidoske.
2Baro Del! o amperato veselil pe kai les sama lestar zurales.
O! sar ažutis les pherel les veselia!
3Tu dian les so manglias lesko ilo,
Ai tu či dian palpale lestar so leske vuš mangle.
4Ke tu phendias leske katar tjiro šukar mištimos,
Tu thodian pe lesko šero jekh kurona anda o
sunakai vužio.
5Vo manglias tutar o traio, tu dian les,
Jekh traio lungo pe sakda ai kai či getol.
6Lesko vestimos si baro ke tu ažutisares les;
Tu thos pe leste tjiro strefiaimos ai tjiro šukarimos.
7Tu keres ande leste pe sakda jekh diela svintsimaski,
Tu pheres les veselia angla tjiri fatsa.
8O amperatos phuril pe ka o Baro Del;
Ai, katar o lašimos katar o Mai Vučo, vo či miškil.
9Tjiro vast arakhela sa tjire dušmanon,
Tjiro čačo vaš arakhela kudalen kai vuřitsin tu.
10Tu keresa anda lende sar jekh bov phabardo,
O dies kai tu sikavesa tu;
O Baro Del phařavela len ande peski xoli,
Ai e jag xala le.
11Tu keresa te bilan lenge šiave pa e phuv,
Ai lengi vitsa maškar le šiave katar o manuš.
12Von gindisaile nasul pe tute,
Von rode nasul so te keren, numa len či avela le zor.
13Ke tu keresa t'ambolden o dumo,
Ai tjira sulitsasa tu tsirdesa pe lende.
14Ušti, Baro Del, tjira zorasa!
Ame kamas te gjilabas, vestisaras tjiri zor.
