1Le Davidoske.
Baro Del si muři vedaria ai muřo skipimos:
Kastar avela mange dar?
O Baro Del si kai ninkerel muřo traio:
Kastar avela mange dar?
2Kana le nasul aven pe mande,
Te xan muřo rat,
Von si kai kjinuin ma ai muře dušmaia
Kai miškin ai peren.
3T'avel jekh armia te del vatra pe mande,
Muřo ilo či avela les či jekh dar.
T'avela pe mande jekh marimos,
Makar kudia avela mange pherdo patiamos.
4Me mangav katar o Baro Del jekh diela, kai kamav zurales.
Me kamav te bešav sa muřo traio ande o kher le Bare Devlesko,
Te dikhav o šukarimos le Bare Devlesko
Ai te dikhav lesko templo.
5Ke vo lela sama mandar ande pesko tabernaklo o dies kai avela nasul,
Vo garavela ma t'arakhel ma ande peski tseřa;
Vo vazdela ma pe jekh bař.
6Ai inke muřo šero vazdel-pe pe muře dušmaia kai si krugom mandar;
Me dava sakrifisuri ande leski tseřa, pe o bašavimos la tuturiazako;
Me gjilabava, me vestiva le Bare Devles.
7Baro Del! ašun muřo hango, me akharav tu:
T'avel tuke mila mandar ai ker pe muři!
8Muřo ilo phenel tutar: Rode muři fatsa!
Me rodav tjiri fatsa, o Baro Del!
9Na garav mandar tjiri fatsa,
Na spide xoliasa tjira sluga!
Tu san muřo skipitori, na muk ma, na šiude ma,
O Del katar muřo skipimos!
10Ke muřo dad ai muři dei mukle ma,
Numa o Baro Del lela ma.
11Baro Del! sikiar ma tjiri vurma,
Ninger ma ande e vurmitsa le čačimaski,
Pala muře dušmaia.
12Na de ma te dragon pe muře dušmaia,
Ke uštile pe mande le xoxamne
Ai žene kai phurden ferdi te maren pe.
13O! te na simas siguro te dikhav o mištimos le Bare Devlesko
Pe e phuv le žividengi!
14Ažiuker ande o Baro Del!
Zuriar ma ai ke tjiro ilo t'avel lašio!
Ažiuker ande o Baro Del!
