1Psalmo. Gjili kai si šinado o kher le Devlesko. Le Davidoske.
2Phařuva dragostar, o Baro Del, ke tu uštadian ma,
Tu či kamlian ke muře dušmaia veselin-pe pe mande.
3Baro Del, muřo Del!
Me tsipisardem pe tute, ai tu sastiardian ma.
4Baro Del! tu ankaladian muřo duxo katar si le mule,
Tu kerdian te mai traiv dur katar kudala kai vulen ande e groapa.
5Gjilaben le Bare Devleske, tume kai kamen les,
Vestin tumare řudjimasa lesko svintsimos!
6Ke leski xoli žial jekh tsiřa vramia,
Numa lesko mištimos sa o traio;
Le roimata aven e riate,
Ai o diminiats e veselia.
7Me phenavas kana sas mange mišto:
Či perava šoha!
8Baro Del! katar tjiro mištimos tu zuriardian muřo plai
Tu garavesas tjiri fatsa, ai nas mange mišto.
9Baro Del! me tsipisardem pe tute,
Manglem katar o Baro Del:
10So niris tu te des muial muřo rat,
Te keres te vuliav ande e groapa?
E kišai si la te řudjil tu?
Phenel voi tjiro čačimos?
11Ašun, Baro Del, t'avel tuke mila mandar!
Baro Del, ažutisar ma!
12Ai te tu pařuvesa muře vatimata ande veselia,
Tu puterdian muřo gono, ai tu phanglian ma veselimasa,
13Eta te muřo ilo te gjilabel tu ai te na bešel muto.
Baro Del, muřo Del! me řudjiva tu sakda.
