Psalmo 31

₂Baro Del! me rodav ande tute te garadiovav:

Ke šoha te na avav tele!

Skipisar ma ande tjiri kris!

₃Bangiar karing mande tjiro kan, gribisavo te ažutis ma!

Av mange jekh bař kai lel sama t'arakhel ma,

Kai arakhav muřo skipimos!

₄Ke tu san muřo bař, muřo armia;

Ai pala tjiro anav tu ningeres ma, tu sikaves ma.

₅Tu ankalavesa ma avri anda e setka kai von thode mange;

Ke tu san kai les sama mandar.

₆Me thav muřo duxo ande tjire vast;

Tu skipisar ma, Baro Del, Del čačimasko!

₇Me vuřitsiv kudalen kai astardion ka intaino xoxamne dela,

Ai me dav ma ka o Baro Del.

₈Me avava katar tjiri dragostia ande o veselimos ai ande veselia;

Ke tu dikhes muřo čořimos, tu žianes o nekazo ande muřo ilo,

₉Ai tu či desa ma ande le vast muře dušmanonge, Tu puterdian mange.

₁₀T'avel tuke mila mandar, Baro Del! ke me sim ande o nekazo;

Si muřo mui, o duxo ai o stato kjinuime katar o nekazo.

₁₁Muřo traio bilal ande e dukh,

Ai muře berš ande o vatimos;

muři zor gelitar pala muři bezex,

Ai muře kokala bilan.

₁₂Sa muře dušmaia kerde anda mande te prasan ma,

Bare prasaimata muře vortakonge, ai dar kudalenge kai si paša mande;

Kudala kai dikhen ma avri našen dur mandar.

₁₃Me sim busterdo katar le ile sar jekh mulo,

Me sim sar jekh kanta phagi.

₁₄Ašunav so mothon but nasul pa mande,

E dar kai amperetsil krugom,

Kana von den pe duma ande jekh than pe mande:

Von den pe duma te len muřo traio.

₁₅Numa ande tute me dav ma, o Baro Del!

Me phenav: Tu san muřo Del!

₁₆Muře diesa ai ande tjire vast;

Skipisar ma katar muře dušmaia ai katar kudala kai rimon ma!

₁₇Ker te strefial tjiri fatsa pe tjiri sluga,

Skipisar ma pala tjiro šukarimos!

₁₈Baro Del, te na avav tele kana akharav tu.

Ke le nasul t'aven tele,

Ke te von vulen lokořes kai si le mule!

₁₉Ke von t'aven muto, le vuš xoxamne,

Kai den duma zorasa pe kon si le vorta,

Barimasa ai vuřitsimasa!

₂₀O! sode si baro tjiro mištimos,

Kai tu thodian rigate kudalenge kai daran tutar,

Kai tu san marturo kudalenge kai roden te

garadion tute,

Kai dikhes le šiave katar o manuš!

₂₁Tu arakhes te garaves les ka tjiri fatsa pe kudala kai amin pe lende,

Tu les sama lendar ande tjiri tseřa katar le šiba kai žian pe lende.

₂₂Svintsime t'avel o Baro Del!

Ke vo sikadias pesko šukarimos karing mande,

Sar t'avilemas ande jekh foro zuralo.

₂₃Me phenavas ande muřo gribimos:

Me sim dino dur katar lesko dikhimos!

Numa tu ašundian o hango kai me mangavas,

Kana tsipisardem karing tute.

₂₄Kamen le Bare Devles, tume kai si tume mila!

O Baro Del garavel le čačen,

Ai vo kerel te pokjinen le barimatange.

₂₅Zuriaren tume ai ke tumaro ilo te ninkerel mišto,

Tume savoře kai ažiukeren ande o Baro Del!