Psalmo 33

₁Vorta, veselin tume ande o Baro Del!

Le řudjimata si mišto le manušenge vorta.

₂Vestin le Bare Devles le tsiturensa,

Vestin les pe o luto le deše sirmensa.

₃Gjilaben leske jekh gjili nevi!

Keren te bašen tumare strumenturia ai tumare hanguri!

₄Ke e vorba le Bare Devleski si vorta,

Ai sa leske dieli kerdion pe čačimasa;

₅Leske drago e kris ai o čačimos;

E dragostia le Bare Devleski pherel e lumia.

₆Le čeri si kerde katar e vorba le Bare Devleski,

Ai sa lengi armi katar o phurdimos anda lesko mui.

₇Vo kjidel ande jekh than le paia la mariake,

Vo garavel le hunia ande le bočonkuri.

₈Ke sa e phuv te daral katar o Baro Del!

Ke sa le naroduri la lumiake te isdran angla leste!

₉Ke vo phenel, ai e diela aresel;

Vo del ordina, ai voi si.

₁₀O Baro Del del muial so gindin pe le thema,

Vo phařavel so gindin pe le naroduri;

₁₁So mangel o Baro Del ašen pe sakda,

Ai so gindil lesko ilo, vitsa vitsatar.

₁₂Veselo o them kai o baro Del si lesko Del!

Veselo o narodo kai vo alosardias t'avel pesko!

₁₃O Baro Del dikhel opral pa le čeri,

Vo dikhel sa le šiave katar o manuš;

₁₄Anda o than kai vo bešel vo lel sama

Sa le narodos la phuviako,

₁₅Vo kerel o ilo savořengo,

Kai lel sama sogodi von keren.

₁₆Nai jekh bari armia kai skipisardias le amperatos,

Nai jekh bari zor kai skipisardias le harnikos;

₁₇O grast nai dosta zuralo te skipil,

Pe o drom leski zor či skipil.

₁₈Eta, e jakh le Bare Devleski si pe kudala kai daran,

Pe kudala kai ažiukeren lesko mištimos,

₁₉Eta t'ankalavel lengo duxo katar o merimos

Ai te kerel te train maškar e bokh.

₂₀Amaro duxo ažiukerel ande o Baro Del;

Vo si amaro skipitori ai amaro fedevo.

₂₁Ke amaro ilo thol ande leste e veselia,

Ke ame si ame patiamos ande lesko anav.

₂₂Baro Del! ke tjiro šukarimos t'avel pe amende,

Sar ame ažiukeras ande tute!