1Le Davidoske.
Baro Del! Le sama mandar katar muře dušmaia,
Mar tu pe kudala kai maren pe mansa!
2Le o tsinořo ai o baro fedevo,
Ai ušti t'ažutisar ma!
3Vazde e xanřo ai o tover kai šinel pa dui riga!
Phen ka muřo duxo: Me sim tjiro skipimos!
4T'aven lažiavarde ai tele, kudala kai kamen te len muřo traio!
Ke te den palpale ai te lolion, kudala kai den pe godji te xasaren ma.
5T'aven sar e menčia kai ningerel e balval,
Ai ke o andželo le Bare Devlesko gonil le!
6Ke lengo drom t'avel tuniariko, ai te isdran,
Ai ke o andželo le Bare Devlesko našel pala lende!
7Ke bi došako von thode mange e kletka pe jekh groapa,
Bi došako von hunade te len mandar o traio.
8Ke o čořimos t'avel pe lende bite žianen,
Ke von t'aven line ande e setka kai von thode mange,
Ke von te peren ai te meren!
9Ai muřo duxo avela les veselia ande o Baro Del,
Veselimos ande lesko skipimos.
10Sa muře kokala phenena: Baro Del! kon šai dastil, sar tute,
Te skipil le čořes katar jekh mai žuralo lestar,
Le nekežimes ai le čořes katar kudo kai lel pa leste?
11Xoxamne martururi ušten:
Von pušen ma pe so me či žianav.
12Von den ma o nasul pala o mištimos:
Muřo duxo si muklo.
13Ai me, kana sas nasvalo, thavas pe mande jekh gono
Telariavas muřo duxo le postosa,
Me řudjivas, o šero bangiardo pe muřo kolin.
14Pala jekh vortako, pala jekh phral, tsirdavas ma lokořes;
Sar te žaliv jekha da,
Bangiuvavas nekežime.
15Porme, kana sas te perav, von veselinas pe ai kidenas pe,
Von kidenas pe bi mange te prasan ma,
Von šinenas ma sakda;
16Kudala kai nai khančeske ai kai maren mui,
Von grintsinas le dand pe mande.
17Baria! ži kana dikhesa le tu?
Le sama katar muřo duxo te na peraven ma,
Muřo traio pe le lionutsuri!
18Me luvudiva tu ande le bare kumpani,
Me vestiva tu maškar jekh baro narodo.
19Ke kudala kai si intaino muře dušmaia či veselina pe von pala mande,
Ke kudala kai vuřitsin ma intaino te na mai prasan ma le dikhimasa!
20Ke von khuven jekh divano kai nai les patiako,
Von den pe godji t'athaven pe le žene kovle le themeske.
21Von putren pe mande pengo mui,
Von phenen: A! A! amare jakha dikhen!
22Baro Del! tu dikhes le! na beš muto!
Baria, na žia dur mandar!
23Ušti, ušti ta ker mange kris!
Muřo Del ai muřo Baro, žia pala mande!
24De kris sar si tjiri kris, Baro Del, muřo Del!
Ai te na veselin pe pala mande!
25Te na phenen ande pengo ilo: A! eta so ame kamas!
Ke te na phenen: Ame angroposardiam les!
26Ke sa ande jekh than t'aven lažiavarde ai tele,
Kudala kai veselin pe anda muřo nekazo!
Ke t'avel pe lende o vuřitsimos ai o lažiav,
Kudala kai ušten pe mande!
27Ke t'avel len veselimos ai t'aven veseli,
Kudala kai si lengo drago ke či sim došalo,
Ai ke phenen sakda: Luvudime t'avel o Baro Del,
Kai kamel e patia peska slugaki!
28Ai muři šib vestila tjiri kris,
Voi phenela sako dies tjiro luvudimos.
