Psalmo 39

₂Me phendem: Me lava sama muře vurmi,

Daratar te kerav bezex katar muři šib;

Phandavava muřo mui,

Sogodi avela o nasul angla mande.

₃Me ašilem muto, či dem duma;

Me ašilem, makar ke nai mange mišto;

Ai muři dukh makar ke si zurali.

₄Muřo ilo phabol ande mande,

Jekh jag andral phabarel ma,

Ai e vorba avili pe muři šib.

₅Baro Del! phen mange sar getola pe muřo traio,

Sode si e mesura muře diesengi;

Ke te žianav sode sim kovlo.

₆Eta, tu dian muře dies o lungimos le vastesko,

Ai muřo traio si sar jekh khanči angla tute.

E, sako manuš opre si ferdi jekh phurdimos.

₇E, o manuš phiravel pe sar jekh ušialin,

Vo miškil pe intaino;

Vo kjidel, ai vo či žianel so lela.

₈Akana, Baria, ke so šai ažiukerav?

Ande tute ažiukerav.

₉Skipisar ma anda sa muře šindimata!

Na tho pe mande o dilimos!

₁₀Me ašiav muto, me či putrav o mui,

Ke tu san kai keres.

₁₁De rigate mandar tjire dukhuma!

Me merav kai mares ma tjire vastesa.

₁₂Tu mares le manušes te pokjinel peski bezex,

Tu phařaves sar o pišom so si mai kuč.

E, sako manuš si jekh phurdimos.

₁₃Ašun muřo řudjimos, Baro Del, ai tho kan ka muře tsipimata!

T'avel tuke mila katar muře asva!

Ke me sim streino tute,

Jekh kai bešel sar sa muře dada.

₁₄De rigate mandar o dikhimos, ai muk ma te phurdav,

Angla savořende te žiavtar ai ke či mai sim!