1Ka o birevo kudalengo kai gjilaben. Pe le luludia. Le šiavenge le Koreske. Gjili. Gjilabaimos kamimosko.
2Vorbi pherde šukar kjirion ande muřo ilo.
Me phenav: muři butji si le amperatoske!
Ke muři šib t'avel sar o por le manušesko kai mišto ramol.
3Tu san o mai šukar anda le šiave le manušeske,
O dragomos si thodino pe tjire vuš:
Sa anda kudia o Del svintsosardias tu pe sakda.
4Zuraleia! Phande tjiri sabia pe tjiro kičo,
Tjire tsolosa ai tjire vestimosasa,
5Ande tjiro vestimos nirisar, ankli pe tjiro vurdon,
Le sama katar o čačimos, o kovlimos ai e kris,
Ai ke tjiro čačo te sikavel šukar so keres!
6Tjire sulitsi si skutsome;
Naroduri perena tela tute;
Von dena anda o ilo le dušmanonge katar o amperato.
7Tjiro skamin amperatisko, o Del, si pe sakda;
E rovli tjira amperetsiaki si jekh rovli vorta.
8Tuke drago e kris, ai tu vuřitsis o nasulimos:
Sa anda kudia, o Del, tjiro Del svintsosardias tu
Jekhe vuloiesa svinto, mai opre sar tjire vortača.
9O miro, o aloes ai e kasia khanden sa tjire tsalia;
Ande e avlin ivaroski le strumenturia sirmenge veselin tu.
10Šeia amperatsonge si maškar kudala kai tu kames;
E amperatsiasa si pe tjiro čačo, pe late o sunakai anda o Ofir.
11Ašun, muři šei, dikh, ai tho kan;
Buster tjire narodos ai o kher tjire dadesko.
12O amperato dikhel pe tjiro šukarimos;
Ke vo si tjiro baro, de les pativa.
13Ai, podarkensa, e šei anda e Tira,
Le mai barvale anda o narodo roden tjiro mištimos.
14Sako šukarimos si e šei katar o amperato andre ande e avlin;
Pe late si jekh tsolo khuvdo sunakasa.
15La sikaven la ka o amperato, peske tsalensa khuvde,
Ai pala late terne šeia, lake vortaki, kai si andine paša o amperato;
16Anen le maškar e veselia ai o veselimos,
Von den andre ande e avlin le amperatoski.
17Tjire šiave lena o than tjire dadengo;
Tu thosa le prinsuri ande sa o them.
18Me dava ma godji ka tjiro anav ande sa le berša:
Kadia le naroduri vestina tu ži ande o gor ai sakda.
