1Ka o birevo kudalengo kai gjilaben. Gjili le Davidoske. 2Kana andias o Doeg, o Edomito, avilo te phenel ka o Saul, phendias leske: o David gelo ande o kher ka o Ahimelek.
3Sostar luvudis tu tut katar tjiro nasulimos, zuralo?
E dragostia le Devleski bešel pe sakda.
4Tjiri šib phenel ferdi xitria,
San jekh bričo skutsome, athaitori kai san!
5Tuke drago o nasulimos mai sigo san o mištimos,
O xoxaimos mai sigo sar O čačimos.
6Tuke drago sa le vorbi kai phařaven,
Šib kai kerniol!
7Kadia o Del peravela tu pe sakda,
Vo thola o vast pe tute ai lela tu anda tjiri tseřa;
Vo ankalavela tu anda e phuv le žividongi.
8Le vorta dikhena, ai von darana,
Ai von kerena anda leste pengo asaimasko:
9Eta o manuš kai či lel le Devles te lel sama lestar,
Numa kai patial pe ande peske bare barvalimata,
Ai kai niril ande peski xitria!
10Ai me, me sim ande o kher le Devlesko sar jekh maslina kai zelenil,
Me dav ma ka o lašimos le Devlesko, sakda ai sode avela;
11Me luvudiva tut sakda, ke tu keres;
Ai me kamav t'ažiukerav ande tjiro anav, ke vo si vorta,
Angla tjire slugi kai patian.
