1Ka o birevo kudalengo kai gjilaben. Pe e melodia «Na phag». Psalmo le Davidoske.
2Šai keren tumen kris bi te den duma?
Šai den tumen kris kadia čačimasa, šiave le manušeske?
3Numa, ande o ilo, tume bilaven le bezexa;
Ande o them, si o pharimos tumare vastengo kai tume thon pe o kintari.
4Le nasul si kurvania de katar o peř penga dako,
Le xoxamne rimon pe san den avri anda o peř penga dako.
5Si le votrava san o sap,
San jekh aspiko kašuko kai phandavel pesko kan,
6Kai či ašunel o hango kai diliaren les,
Katar le drabarne le mai xitri.
7O Del, phag lenge dand ande o mui!
Baro Del, ankalav le falki le lionutsonge!
8Ke te puřitsin pe sar le paia kai vulen!
Ke von te šiuden ferdi sulitsi kovle!
9Ke te xasavon perimasa, san jekh melčo;
Bi te dikhen o kham, san jekh šiudino katar jekh žiuvli!
10Angla savořende ke tumare bova šungan le kanře,
Zeleno vai pařasa, e balval ningerela le.
11O vorta avela ande e veselia, kana dikhel ke pokjinen;
Vo naiarela peske punře ande o rat le nasulengo.
12Ai le manuš phenena: E, si jekh podarka kudaleske kai si lašio;
E, si jekh Del kai del kris pe e phuv.
