1Ka o birevo kudalengo kai gjilaben. Gjili. Psalmo.
Spiden karing o Del tsipimata veseli,
Tume sa, narodo la phuviako!
2Gjilaben o vestimos leske anavesko,
Vestin lesko barimos tumare luvudimasa!
3O Del phendias: Ke tjire butia si zurale!
Pala o barimos tjira zorako, tjire dušmaia řezgin tu.
4Sa e phuv klonil pe angla tute ai gjilabel ande tjiri pativ;
Voi gjilabel tjiro anav.
5Aven ai dikhen le butia le Devleske!
Vo si zuralo kana kerel pe le šiave katar o manuš.
6Vo pařuvel e maria, kerel anda late jekh phuv šuki,
Nakhel o pai phirindo:
Atunči ame veselisaras ande leste.
7Vo si baro sakda katar peski zor,
Leske jakha len sama le thema:
Ke kon buntuin pe te na ušten.
8Naroduri, svintson amare Devles,
Keren te ašundion leske vestimata!
9Vo garavel o traio amare duxosko,
Ai či muklias ke te amaro punřo del rigate.
10Ke tu zumadian ame, o Del!
Sar vužiardian o rup le jagasa.
11Tu andian ame ande e sita,
Tu thodian pharimos pe amare zeia,
12Tu muklian t'anklen pe amare šere le manuš;
Ame nakhliam pa e jag ai pa o pai.
Numa tu lian ame avri te des ame but.
13Me žiava ande tjiro kher le phabarimasa,
Me kerava so phendem karing tute:
14Lenge muře vuš puterdile,
Ai muřo mui phendias le ande muřo nekazo.
15Me dava tut bakriořa thule phabarimaske,
Le čikenesa katar le buzniake;
Me dava bakriořa le bakrensa.
16Aven, ašunen, tume sa kai daran katar o Del, ai me phenava
So vo kerdias muře duxoske.
17Me tsipisardem pe leste muře mosa,
Ai o luvudimos sas pe muři šib.
18Te kerdemas bezex ande muřo ilo,
O Baro sas te na kerel pe muři.
19Numa o Del kerdias pe muři,
Vo ašundias mišto o hango muře řudjimasko.
20Svintsime t'avel o Del,
Kai či šiudias palpale muřo řudjimos,
Ai kai či tsirdias ma katar pesko mištimos!
