1Ka o birevo kudalengo kai gjilaben. Le Davidoske. Psalmo. Gjili.
2O Del uštel, leske dušmaia našen pe sako rig,
Ai leske dušmaia našen angla leste.
3Sar o thuv bilal, tu bilaves le;
Sar o mom bilal pe e jag,
Le nasul bilavon angla o Del.
4Numa le vorta veselin pe, von ambolden angla o Del,
Len lias le e bari veselia.
5Gjilaben le Devleske, vestin lesko anav!
Lašiaren e vurma kudaleske kai žial ande le platski!
O Baro Del si lesko anav, veselin tume angla leste!
6O dad le baiastrukongo, kai lel sama katar le phivlia,
Si o Del ande pesko kher svinto.
7O Del del jekh familia kudalenge kai sas šiudine,
Vo skipil le phanglen ai kerel t'aven veseli;
Le buntuimaske ferdi bešen ande le thana nange.
8O Del! kana tu anklistian avri ka o šero tjire narodosko,
Kana tu phiresas ande e pusta,
9E phuv isdralas, le čeri phařadionas angla o Del,
O Sinai miškilas angla o Del, o Del anda o Israel.
10Tu kerdian te perel jekh brišin lašio, o Del!
Tu zuriardian so sas tjiro than kjinuime.
11Tjiro narodo thodias pesko bešimos ande o them
Ke katar tjiro lašimos, o Del! tu lašiardianas les le čořenge.
12O Baro phenel jekh vorba,
Ai kudala kai ningeren le laše nevesti si jekh bari armia:
13Le amperatsi le armienge našen, našen,
Ai kudala kai bešen ande o kher hulaven o mandjin.
14Žikin tume hodinin maškar le stali
Le phaka le gulumboske pherde le nip,
Ai lesko por si sar jekh galbeno sunakuno.
15Kana o Mai Zuralo dias avri le amperatson anda o them,
E phuv aresli parni sar o iv anda o Tsalmon.
16Baro plai, plai le Bašanosko,
Plai le bute gorenge, plai le Bašanosko,
17Sostar, plaia le bute gorenge, phařon tume
Pe o plai kai o Del kamlias te bešel?
O Baro Del sa vo thovela kothe pesko them kai bešela sakda.
18Le vurdona le Bare Devleske si gjinde biše miensa,
Miensa ai miensa;
O Baro si maškar lende,
O Sinai si ande o svinto than.
19Tu anklistian opre, tu ningerdian phangle kothe,
Tu lian podarki maskar le manuš,
Ai vi maskar le buntuimaske manušen;
Kai o Del, o Baro Del, sai bešela kothe.
20Svintsime t'avel o Baro sako dies!
Kana phariaren pe amende, o Del skipil ame.
21O Del si amenge o Del le skipimasko,
Ai o Baro Del, o Baro, šai lel sama amendar anda o merimos.
22E, o Del phařavela o šero peske dušmanonge,
O šero opral kudalengo kai train ande e bezex.
23O Baro phenel: Me anava le anda o Bašan,
Me anava le anda o fundo la mariako,
24Eta te naios tjiro punřo ande o rat,
Ai ke e šib tjire žiuklengi t'avel lenge partia katar le dušmaia.
25Von dikhen sar ai phires, o Del!
O phirimos muře devlesko, muře amperatosko, ande o svinto than.
26Anglal žian le gjilabatoria, porme kudala kai bašaven le strumenturia,
Maškar le šeia ternia kai maren le tambururi.
27Svintson le Devles ande le kjidimata,
Svintson le Bares, kai aven anda o Israel!
28Kothe si o Beniamin, o mai terno, kai si baro pe lende,
Le birevia anda o Juda ai lengi trupa,
Le birevia anda o Zabulon, le birevia anda o Neftali.
29Tjiro Del del tu ordina t'aves zuralo;
Zuriar, o Del, so tu kerdian amenge!
30Anda tjiro templo tu amperetsis pe o Jerusalem;
Le amperatsi anena tuke podarki.
31Darav la žigenia anda le paiořa,
E trupa le guruvengi le vitselonsa le narodonge,
Ke te klonin pe von penge kotore rupensa!
Xasar le narodon kai si lengo drago te maren pe!
32Bare aven anda e Egipta;
E Abizinia našel, le vast vazde karing o Del.
33Thema la phuviake, gjilaben ka o Del,
Vestin le Bares!
34Gjilaben ka kudo kai žial angle ande le čeri, le čeri pe sakda!
Eta, vo kerel t'ašunen lesko hango, lesko hango zuralo.
35Den vestimos le Devles!
Leski amperetsia si pe o Israel, ai leski zor ande le čeri.
36Anda tjiro svinto than, o Del! tu san kai daravel.
O Del anda o Israel del peske narodos zor ai zuralimos.
Svintsime t'avel o Del!
