1Le Salomonoske.
O Del, de tjiri krisa ka o amperato,
Ai tjiri kris ka o šiav le amperatosko!
2Vo dela kris tjire narodos krisasa vorta,
Ai tjire čořen sar trubul.
3Le plaia ningerena e patia le narodoske,
Ai le plaiořa vi von, te sikaven tjiri kris.
4Vo dela zakono ka le čoře le narodoske,
Vo skipila le šiave le čořeske,
Ai vo inčarela kudales kai phariaras pe lende.
5Darana tutar, sogodi avela o kham,
Sogodi sikadiola o šiunuto, vitsa vitsatar.
6Vo avela sar jekh brišin kai perel pe jekh phuv šindi,
Sar le paiořa kai kingiaren e kimpo.
7Ande kudo dies o vorta avela les luludia,
Ai e patia avela bari žikin či mai avela šiunuto.
8Vo avela baro de katar jekh maria ži ka e kaver,
Ai ka o pai ka le gora la lumiake.
9Angla leste, le naroduri anda e pusta bangiarena e čang,
Ai leske dušmaia čařena e pulberia.
10Le amperatsi anda o Taršiš ai anda le inzuli pokjinena strafo,
Le amperatsi anda o Šeba ai anda o Saba dena podarki.
11Sa le amperatsi klonina pe angla leste,
Sa le thema služina les.
12Ke vo skipila le čořes kai tsipil,
Ai le čořes kai či ažutin les.
13Leske avela mila katar o čořo ai o prosto,
Ai vo skipila o traio le čořengo;
14Vo lela le katar o pharimos ai katar o nasulimos,
Ai lengo rat avela leske kuč ka leske jakha.
15Von traina, ai dena les sunakai anda o Šeba;
Von řudjina leske bi te terdion, von svintsona les sako dies.
16Le gjiva butiona ande o them, opre pe le plaia,
Ai lenge simintsi miškina sar le kopačia anda o Libano;
Le manuš luludiona ande le foruri sar e čar la phuviaki.
17Lesko anav bešela sakda,
Sogodi avela o kham, lesko anav žiala angle;
Lestar tume svintsona tume jekh avres,
Ai sa la thema phenena ke si veselo.
18Svintsime t'avel o Baro Del
Del, o Del katar o Israel,
Kai ferdi kerel čudeni!
19Svintsime t'avel pe sakda lesko anav vestime!
Ke sa e phuv t'avel pherdi lesko vestimos! Amen! Amen!
20Gata le řudjimata le Davidoske, šiav katar o Jesai.
