1Ka o birevo kudalengo kai gjilaben. Pala o Gittit. Katar o Asaf.
2Gjilaben veselimasa ka o Del, amari zor!
Phurden tsipimos veseli karing o Del katar o Jakob!
3Len te gjilaben gjili, keren te bašen le tamburinuri,
E tsitura melodisko ai o luto!
4Bašaven e tuturiaza pe o nevo šiunuto,
Pe o pherdo šiunuto, o dies amare prasnikosko!
5Ke si jekh zakono pe o Israel,
Jekh ordina katar o Del anda o Jakob.
6Vo kerdias jekh granitsako bař le Josefoske,
Kanavo phirdias pe o them e Egipta:
Me ašundem jekh hango kai či prinžiaravas:
7Me lem o pharimos pa lesko dumo,
Ai leske vast mukle le košnitsi.
8Tu tsipisardian ande o nekazo, ai me skipisardem tu;
Me dem tu anglal kana žialas palpale o řondieto;
Me zumadem tu ka le paia ande o Meriba.
9Ašun, muřo narodo! ai me phenava tuke;
Israel, te šai ašunes mande!
10Te na avel maškar tute del streino!
Na klonisavo angla le dela streia!
11Me sim o Baro Del, tjiro Del, kai kerdias tu t'ankles avri anda o them e Egipta;
Puter tjiro mui, ai me pherava les.
12Numa muřo narodo či ašundias muřo hango,
O Israel či patias.
13Atunči me muklem le pe so gindilas lengo ilo,
Ai von gele pala so von gindisaile.
14O! t'avilinosas muřo narodo t'ašunel mande,
Te o Israel te phirdinosas ande muře vurmi!
15Ande jekh vramia thodemas tele lenge dušmanon,
Me amboldemas muřo vast pe lenge dušmaia;
16Kudala kai vuřitsin le Bare Devles řezgin les,
Ai e veselia ande o Israel žiala pe sakda;
17Me dava les te xal o mai lašio xamos,
Ai me pravarava les le avdjinesa anda o bař.
