1Ka o birevo kudalengo kai gjilaben. Pala o Gittit. Le šiavenge le Koreske. Psalmo.
2Sar tjire khera si drago,
Baro Del le řaioske zurale.
3Muřo duxo nekežil ai vatil paša le baria le Bare Devleske,
Muřo ilo ai muřo gindo phurden tsipimos karing o Del živindo.
4E čiriklioři inke arakhel jekh kher,
Ai e čirikli milaski jekh kuibo kai voi thol peske tsinořen.
Tjire altaria, Baro Del le řaioske zurale!
Muřo amperato ai muřo Del!
5Veseli kudala kai bešen ande tjiro kher!
Von šai mai vestin tu.
6Veseli kudala kai thon ande tute te ninkeren pe!
Von arakhen ande pengo ilo vurmi šinde.
7Kana von nakhen ande e dolina o Baka,
Von ambolden la ande jekh than pherdo paia,
Ai o brišin pherel la svintsimos.
8Lengi zor butiol kana phiren,
Ai von sikaven pe angla o Del ande o Sion.
9Baro Del, Del le řaioske zurale, ašun muřo řudjimos!
Tho o kan, Del katar o Jakob!
10Tu kai san amaro fedevo, dikh, o Del!
Ai dikh e fatsa tjire svintosko!
11Mai mišto jekh dies ka tjire vudara sar jekh mia ka le kaver;
Mai drago mange te bešav angla o kher muře Devlesko,
Sar te bešav tela le tseři nasul.
12Ke o Del o Baro si jekh kham ai jekh fedevo,
O Baro Del del e dragostia ai o vestimos,
Vo del sa o mištimos ka kudala kai phiren ande o čačimos.
13Baro Del le řaioske zurale!
Veselo o manuš kai si ande tute!
