Psalmo 89

₂Me gjilabava sakda le dragosti le Bare Devleske;

Muřo mui kerela te žianen sakda tjiro čačimos.

₃Ke me phenav: E dragostia si zurali de dumult;

Tu thodian tjiro čačimos ande le čeri.

₄Me kerdem patia kasa me alosardem;

Eta so me solaxadem ka o David, muři sluga:

₅Me ninkerava tjiri vitsa pe sakda,

Ai me thava tjiro skamin amperatisko pe sakda.

₆Le čeri vestina tjire šukarimata, o Baro Del!

Ai tjiro čačimos kai kjiden pe le svintsi.

₇Ke kon, ande o čeri, šai gindin pe ke si sar o Baro Del?

Kon maškar le šiave katar le dela si sar o Baro Del?

₈O Del daravel ande o than kai kjiden pe le svintsi,

Vo daran lestar maškar sa kudala kai terdion krugom les.

₉Baro Del, o Del le řaioske zurale, kon si sar tute zuralo, o Baro Del?

Tjiro čačimos terdiol krugom tu.

₁₀Tu teliares o barimos la mariako;

Kana lake talazuria ušten, tu ašiaves le.

₁₁Tu inčares o smovo Rahab sar jekh stato kai si mulo,

Tu phařavesa tjire dušmanon katar e zor tjire vasteski.

₁₂Tjire si le čeri ai e phuv,

Tu kerdian e lumia ai so si ande late.

₁₃Tu kerdian e rig opre ai e rig tele;

O Tabor ai o Hermon veselin pe ande tjiro anav.

₁₄Tjiro vast si zuralo,

Tjiro vast zuralo, tjiro čačo opre.

₁₅E kris ai o čačimos si kai ninkerel tjiro skamin amperatisko.

O mištimos ai o čačimos si angla tjiri fatsa.

₁₆Veselo o narodo kai žianel o bašimos tjira tuturiazako;

Vo phiral ka o strefiaimos tjira fatsako, o Baro Del!

₁₇Vo veselil pe sakda ka tjiro anav,

Ai vo vestil pe ande tjiri kris.

₁₈Ke tu san o vestimos leska zurako;

Si tjiri dragostia kai uštiavel amari zor.

₁₉Ke o Baro Del si amaro fedevo,

O Svinto anda o Israel si amaro amperato.

₂₀Atunči tu dian duma ande jekh suno kas tu kames,

Ai tu phenes: Me ažutiv jekhe harnikos,

Me uštiardem maškar o narodo jekhe terne muršes;

₂₁Me arakhlem o David, muři sluga,

Me svintsosardem les muře vuloiesa svinto.

₂₂Muřo vast ninkerela les,

Ai muřo vast zuriarela les.

₂₃O dušmano či lela les,

Ai o nasul či dela opral pa leste;

₂₄Me inčarava angla leste leske dušmanon,

Ai me malavava kudalen kai vuřitsin les.

₂₅Muřo čačimos ai muři dragostia avena lesa,

Ai leski zor uštela katar muřo anav.

₂₆Me thava lesko vast pe e maria,

Ai lesko čačo pe le paia.

₂₇Vo, akharela ma: Tu san muřo Dad,

Muřo Del ai o bař muře skipimasko!

₂₈Ai me, kerava anda leste o mai angluno arakhado,

O mai opre anda le amperatsi la phuviake.

₂₉Me garavava leske sakda muři dragostia,

Ai muři patia avela lesa čači;

₃₀Me kerava t'avel leski vitsa pe sakda,

Ai lesko skamin amperatisko sar le diesa le čerenge.

₃₁T'avena leske šiave ke muken muřo zakono

Ai či phirena sar si leski ordini,

₃₂Te šinena so me phendem

Ai či len sama muře poronki,

₃₃Me marava la řaiasa so von šibisaile,

Ai maladimasa lenge bezexa;

₃₄Numa či lava lestar muři dragostia

Ai me či rimova muřo čačimos,

₃₅Me či šinava muři patia

Ai me či pařuvava so ankliste katar muře vuš.

₃₆Me solaxav jekh data katar muřo svintsimos:

Xoxavava me ka o David?

₃₇Leski vitsa bešela pe sakda;

Lesko skamin amperatisko avela angla mande sar o kham,

₃₈Sar o šiunuto avela les jekh traio sakda but.

O marturo kai si ande o čeri si čačo.

₃₉Ai inke, tu šiudian, tu dian palpale!

Tu xoliailian pe tjiro svinto!

₄₀Tu dian rigate e patia tjira slugasa;

Tu peradian, mahrisardian leski kurona.

₄₁Tu phařadian sa leske ziduri,

Tu dian muial leske armi.

₄₂Kon godi nakhle line pa leste;

Vo sas jekh lažiav leske vortakonge.

₄₃Tu uštiadian o čačo leske dušmanongo,

Tu veselisardian sa leske dušmanon;

₄₄Tu kerdian te del palpale o šinimos katar leski xanřo,

Ai tu či ninkerdian les ande o marimos.

₄₅Tu ašiadian lesko šukarimos,

Ai tu šiudian lesko skamin amperatisko tele;

₄₆Tu gribisardian le diesa leske ternimaske,

Tu pherdian les lažiav.

₄₇Ži kana, Baro Del! garadios tu sakda,

Ai tjiri xoli phabola voi sar e jag?

₄₈De tu godji sode šai žial muřo traio,

Ai pe savo khanči tu kerdian le šiave le manušeske.

₄₉Si jekh manuš kai šai trail ai či dikhel o merimos,

Kai šai skipil pesko duxo katar si le mule?

₅₀Kai le von, Baria! tjire dragosti le mai angluni,

Kai tu solaxadian ka o David ande tjiro čačimos?

₅₁De tu godji, Baria! o lažiamos tjire slugengo,

De tu godji ke si ande muřo brek sa le naroduri but;

₅₂De tu godji katar o lažiav tjire dušmanongo, o Baro Del!

Katar o lažiamos thode pe le pasuri tjire svintsosko.

₅₃Svintsime t'avel pe sakda o Baro Del! Amen! Amen!