Psalmo 9

₂Me luvudiva le Bare Devles anda sa muřo ilo,

Me phenava sa tjire šukarimata.

₃Me kerava anda tute e diela muře veselimaski ai muře dragoski,

Me gjilabava tjiro anav, Del Mai Vučo!

₄Muře dušmaia den palpale,

Von peren, von xasavon angla tjiri fatsa.

₅Ke tu ninkeres muřo čačimos ai muřo zakono,

Tu des kris pe tjiro skamin amperatisko san jekh vorta krisinitori.

₆Tu mares le kaver themen, tu phařaves le nasulen,

Tu khoses lengo anav pe sakda ai ande o gor.

₇Manai dušmaia! phařaimos pe sakda!

Foruri kai tu dian muial!

Khonik či mai žianen lenge ginduri.

₈O Baro Del amperetsil pe sakda,

Vo thodias pesko skamin amperatisko te kerel kris.

₉Vo del kris la lumia čačimasa,

Vo del kris le narodon san trubul.

₁₀O Baro Del si jekh kai garadion leste kudala kai si marde,

Jekh kai garadion ande e vramia e čoři.

₁₁Kudala kai žianen tjiro anav den pe tuke.

Ke tu či mukes kudalen kai roden tu, o Baro Del!

₁₂Gjilaben le Bare Devleske, kai bešel ande o Sion,

Mothon maškar le naroduri leske bare dieli!

₁₃Kana vo pokjinel o rat, serel len

Vo či bustrel kudalen kai pokarain pe.

₁₄T'avel tuke mila mandar, Baro Del!

Dikh o čořimos kai kerde anda mande muře dušmaia,

Le ma katar le vudara le merimaske,

₁₅Eta te phenav sa tjire luvudimata,

Ande le vudara katar e šei anda o Sion,

Ai ke te veseli ma ande tjiro skipimos.

₁₆Le kaver naroduri peren ande e groapa kai von kerde,

Lengo punřo lias pe ande e sletka kai von garade.

₁₇O Baro Del sikadiol, vo kerel kris,

Vo lel le nasules ande e butji peske vastengi.

₁₈Le nasul ambolden pe karing bešen le mule,

Sa le streia naroduri kai bustren le Devles.

₁₉Ke o čořo nai vo busterdo pe sakda,

So ažiukeren le čoře či xasavol pe sakda.

₂₀Ušti, o Baro Del! Ke te na niril o manuš!

Ke le streia naroduri t'aven dine kris angla tjiri fatsa!

₂₁Malav le darasa, o Baro Del!

Ke le naroduri te žianen ke von si ferdi manuš?