Psalmo 97

₁O Baro Del amperetsil: ke e phuv t'avel veselo,

Ke te le but inzuli veselin pe!

₂Le nuveria ai o tuniariko terdion krugom les,

E kris ai o čačimos ninkeren lesko skamin amperatisko.

₃E jag phirel angla leste,

Ai phabarel krugom leske dušmanon.

₄Leske strefialimata strefian e lumia,

E phuv dikhel les ai isdral;

₅Le plaia bilan sar o mom angla o Baro Del,

Angla o Baro sa la phuviako.

₆Le čeri phenen leski kris,

Ai sa le naroduri dikhen lesko vestimos.

₇Von si tele, sa kudala kai služin le statui,

Kai keren pengo luvudimos ande le xoxamne dela.

Sa le dela klonin pe angla leste.

₈O Sion ažiukerel les ai veselil pe,

Le šeia anda o Juda si ande e veselia,

Pala tjire krisa, o Baro Del!

₉Ke tu, Baro Del! tu san o Mai Vučo pe sa e phuv,

Tu san amperatisko opral sa le čeri.

₁₀Tume kai kamen le Bare Devles, vuřitsin o nasulimos!

Vo arakhel le duxuri le čačenge.

Vo skipil le anda o vast le nasulengo.

₁₁E vedaria si thodini kaske si vorta,

Ai e veselia kudalenge kai lengo ilo si vorta.

₁₂Vorta, veselin tume ande o Baro Del,

Ai vestin tumare řudjimasa leske svintsimos!