LAMENTATIONES 5

ἐπίβλεψον καὶ ἰδὲ τὸν ὀνειδισμὸν ἡμῶν.

₂κληρονομία ἡμῶν μετεστράφη ἀλλοτρίοις,

οἱ οἶκοι ἡμῶν ξένοις.

₃ὀρφανοὶ ἐγενήθημεν, οὐχ ὑπάρχει πατήρ·

μητέρες ἡμῶν ὡς αἱ χῆραι.

₄ἐξ ἡμερῶν ἡμῶν ξύλα ἡμῶν ἐν ἀλλάγματι ἦλθεν.

₅ἐπὶ τὸν τράχηλον ἡμῶν ἐδιώχθημεν·

ἐκοπιάσαμεν, οὐκ ἀνεπαύθημεν.

₆Αἴγυπτος ἔδωκεν χεῖρα,

Ασσουρ εἰς πλησμονὴν αὐτῶν.

₇οἱ πατέρες ἡμῶν ἥμαρτον, οὐχ ὑπάρχουσιν·

ἡμεῖς τὰ ἀνομήματα αὐτῶν ὑπέσχομεν.

₈δοῦλοι ἐκυρίευσαν ἡμῶν,

λυτρούμενος οὐκ ἔστιν ἐκ τῆς χειρὸς αὐτῶν.

₉ἐν ταῖς ψυχαῖς ἡμῶν εἰσοίσομεν ἄρτον ἡμῶν

ἀπὸ προσώπου ῥομφαίας τῆς ἐρήμου.

₁₀τὸ δέρμα ἡμῶν ὡς κλίβανος ἐπελιώθη,

συνεσπάσθησαν ἀπὸ προσώπου καταιγίδων λιμοῦ.

₁₁γυναῖκας ἐν Σιων ἐταπείνωσαν,

παρθένους ἐν πόλεσιν Ιουδα.

₁₂ἄρχοντες ἐν χερσὶν αὐτῶν ἐκρεμάσθησαν,

πρεσβύτεροι οὐκ ἐδοξάσθησαν.

₁₃ἐκλεκτοὶ κλαυθμὸν ἀνέλαβον,

καὶ νεανίσκοι ἐν ξύλῳ ἠσθένησαν.

₁₄καὶ πρεσβῦται ἀπὸ πύλης κατέπαυσαν,

ἐκλεκτοὶ ἐκ ψαλμῶν αὐτῶν κατέπαυσαν.

₁₅κατέλυσεν χαρὰ καρδίας ἡμῶν,

ἐστράφη εἰς πένθος ὁ χορὸς ἡμῶν.

₁₆ἔπεσεν ὁ στέφανος τῆς κεφαλῆς ἡμῶν·

οὐαὶ δὴ ἡμῖν, ὅτι ἡμάρτομεν.

₁₇περὶ τούτου ἐγενήθη ὀδυνηρὰ ἡ καρδία ἡμῶν,

περὶ τούτου ἐσκότασαν οἱ ὀφθαλμοὶ ἡμῶν·

₁₈ἐπ᾽ ὄρος Σιων, ὅτι ἠφανίσθη,

ἀλώπεκες διῆλθον ἐν αὐτῇ.

₁₉σὺ δέ, κύριε, εἰς τὸν αἰῶνα κατοικήσεις,

ὁ θρόνος σου εἰς γενεὰν καὶ γενεάν.

₂₀ἵνα τί εἰς νῖκος ἐπιλήσῃ ἡμῶν,

καταλείψεις ἡμᾶς εἰς μακρότητα ἡμερῶν;

₂₁ἐπίστρεψον ἡμᾶς, κύριε, πρὸς σέ, καὶ ἐπιστραφησόμεθα·

καὶ ἀνακαίνισον ἡμέρας ἡμῶν καθὼς ἔμπροσθεν.

₂₂ὅτι ἀπωθούμενος ἀπώσω ἡμᾶς,

ὠργίσθης ἐφ᾽ ἡμᾶς ἕως σφόδρα.