PSALMI 28

Ἐνέγκατε τῷ κυρίῳ, υἱοὶ θεοῦ,

ἐνέγκατε τῷ κυρίῳ υἱοὺς κριῶν,

ἐνέγκατε τῷ κυρίῳ δόξαν καὶ τιμήν,

₂ἐνέγκατε τῷ κυρίῳ δόξαν ὀνόματι αὐτοῦ,

προσκυνήσατε τῷ κυρίῳ ἐν αὐλῇ ἁγίᾳ αὐτοῦ.

₃φωνὴ κυρίου ἐπὶ τῶν ὑδάτων,

ὁ θεὸς τῆς δόξης ἐβρόντησεν,

κύριος ἐπὶ ὑδάτων πολλῶν.

₄φωνὴ κυρίου ἐν ἰσχύι,

φωνὴ κυρίου ἐν μεγαλοπρεπείᾳ.

₅φωνὴ κυρίου συντρίβοντος κέδρους,

καὶ συντρίψει κύριος τὰς κέδρους τοῦ Λιβάνου

₆καὶ λεπτυνεῖ αὐτὰς ὡς τὸν μόσχον τὸν Λίβανον,

καὶ ὁ ἠγαπημένος ὡς υἱὸς μονοκερώτων.

₇φωνὴ κυρίου διακόπτοντος φλόγα πυρός,

₈φωνὴ κυρίου συσσείοντος ἔρημον,

καὶ συσσείσει κύριος τὴν ἔρημον Καδης.

₉φωνὴ κυρίου καταρτιζομένου ἐλάφους,

καὶ ἀποκαλύψει δρυμούς·

καὶ ἐν τῷ ναῷ αὐτοῦ πᾶς τις λέγει δόξαν.

₁₀κύριος τὸν κατακλυσμὸν κατοικιεῖ,

καὶ καθίεται κύριος βασιλεὺς εἰς τὸν αἰῶνα.

₁₁κύριος ἰσχὺν τῷ λαῷ αὐτοῦ δώσει,

κύριος εὐλογήσει τὸν λαὸν αὐτοῦ ἐν εἰρήνῃ.