PSALMI 97

Ἄισατε τῷ κυρίῳ ᾆσμα καινόν,

ὅτι θαυμαστὰ ἐποίησεν κύριος·

ἔσωσεν αὐτῷ ἡ δεξιὰ αὐτοῦ

καὶ ὁ βραχίων ὁ ἅγιος αὐτοῦ.

₂ἐγνώρισεν κύριος τὸ σωτήριον αὐτοῦ,

ἐναντίον τῶν ἐθνῶν ἀπεκάλυψεν τὴν δικαιοσύνην αὐτοῦ.

₃ἐμνήσθη τοῦ ἐλέους αὐτοῦ τῷ Ιακωβ

καὶ τῆς ἀληθείας αὐτοῦ τῷ οἴκῳ Ισραηλ·

εἴδοσαν πάντα τὰ πέρατα τῆς γῆς τὸ σωτήριον τοῦ θεοῦ ἡμῶν.

₄ἀλαλάξατε τῷ θεῷ, πᾶσα ἡ γῆ,

ᾄσατε καὶ ἀγαλλιᾶσθε καὶ ψάλατε·

₅ψάλατε τῷ κυρίῳ ἐν κιθάρᾳ,

ἐν κιθάρᾳ καὶ φωνῇ ψαλμοῦ·

₆ἐν σάλπιγξιν ἐλαταῖς καὶ φωνῇ σάλπιγγος κερατίνης

ἀλαλάξατε ἐνώπιον τοῦ βασιλέως κυρίου.

₇σαλευθήτω ἡ θάλασσα καὶ τὸ πλήρωμα αὐτῆς,

ἡ οἰκουμένη καὶ οἱ κατοικοῦντες ἐν αὐτῇ·

₈ποταμοὶ κροτήσουσιν χειρὶ ἐπὶ τὸ αὐτό,

τὰ ὄρη ἀγαλλιάσονται,

₉ὅτι ἥκει κρῖναι τὴν γῆν·

κρινεῖ τὴν οἰκουμένην ἐν δικαιοσύνῃ

καὶ λαοὺς ἐν εὐθύτητι.