PSALMI SALOMONIS 14

₁Πιστὸς κύριος τοῖς ἀγαπῶσίν αὐτὸν ἐν ἀληθείᾳ,

τοῖς ὑπομένουσιν παιδείαν αὐτοῦ,

₂τοῖς πορευομένοις ἐν δικαιοσύνῃ προσταγμάτων αὐτοῦ,

ἐν νόμῳ, ᾧ ἐνετείλατο ἡμῖν εἰς ζωὴν ἡμῶν.

₃ὅσιοι κυρίου ζήσονται ἐν αὐτῷ εἰς τὸν αἰῶνα·

ὁ παράδεισος τοῦ κυρίου, τὰ ξύλα τῆς ζωῆς, ὅσιοι αὐτοῦ.

₄ἡ φυτεία αὐτῶν ἐρριζωμένη εἰς τὸν αἰῶνα,

οὐκ ἐκτιλήσονται πάσας τὰς ἡμέρας τοῦ οὐρανοῦ·

₅ὅτι ἡ μερὶς καὶ κληρονομία τοῦ θεοῦ ἐστιν Ισραηλ.

₆Καὶ οὐχ οὕτως οἱ ἁμαρτωλοὶ καὶ παράνομοι,

οἳ ἠγάπησαν ἡμέραν ἐν μετοχῇ ἁμαρτίας αὐτῶν·

₇ἐν μικρότητι σαπρίας ἡ ἐπιθυμία αὐτῶν,

καὶ οὐκ ἐμνήσθησαν τοῦ θεοῦ.

₈ὅτι ὁδοὶ ἀνθρώπων γνωσταὶ ἐνώπιον αὐτοῦ διὰ παντός,

καὶ ταμιεῖα καρδίας ἐπίσταται πρὸ τοῦ γενέσθαι.

₉διὰ τοῦτο ἡ κληρονομία αὐτῶν ᾅδης καὶ σκότος καὶ ἀπώλεια,

καὶ οὐχ εὑρεθήσονται ἐν ἡμέρᾳ ἐλέους δικαίων·

₁₀οἱ δὲ ὅσιοι κυρίου κληρονομήσουσιν ζωὴν ἐν εὐφροσύνῃ.