SIRACIDES 36

₁Ἐλέησον ἡμᾶς, δέσποτα ὁ θεὸς πάντων, καὶ ἐπίβλεψον

καὶ ἐπίβαλε τὸν φόβον σου ἐπὶ πάντα τὰ ἔθνη·

₂ἔπαρον τὴν χεῖρά σου ἐπὶ ἔθνη ἀλλότρια,

καὶ ἰδέτωσαν τὴν δυναστείαν σου.

₃ὥσπερ ἐνώπιον αὐτῶν ἡγιάσθης ἐν ἡμῖν,

οὕτως ἐνώπιον ἡμῶν μεγαλυνθείης ἐν αὐτοῖς·

₄καὶ ἐπιγνώτωσάν σε, καθάπερ καὶ ἡμεῖς ἐπέγνωμεν

ὅτι οὐκ ἔστιν θεὸς πλὴν σοῦ, κύριε.

₅ἐγκαίνισον σημεῖα καὶ ἀλλοίωσον θαυμάσια,

δόξασον χεῖρα καὶ βραχίονα δεξιόν·

₆ἔγειρον θυμὸν καὶ ἔκχεον ὀργήν,

ἔξαρον ἀντίδικον καὶ ἔκτριψον ἐχθρόν.

₇σπεῦσον καιρὸν καὶ μνήσθητι ὁρκισμοῦ,

καὶ ἐκδιηγησάσθωσαν τὰ μεγαλεῖά σου.

₈ἐν ὀργῇ πυρὸς καταβρωθήτω ὁ σῳζόμενος,

καὶ οἱ κακοῦντες τὸν λαόν σου εὕροισαν ἀπώλειαν.

₉σύντριψον κεφαλὰς ἀρχόντων ἐχθρῶν

λεγόντων Οὐκ ἔστιν πλὴν ἡμῶν.

₁₀συνάγαγε πάσας φυλὰς Ιακωβ

καὶ κατακληρονόμησον αὐτοὺς καθὼς ἀπ᾽ ἀρχῆς.

₁₁ἐλέησον λαόν, κύριε, κεκλημένον ἐπ᾽ ὀνόματί σου

καὶ Ισραηλ, ὃν πρωτογόνῳ ὡμοίωσας.

₁₂οἰκτίρησον πόλιν ἁγιάσματός σου,

Ιερουσαλημ τόπον καταπαύματός σου·

₁₃πλῆσον Σιων ἀρεταλογίας σου

καὶ ἀπὸ τῆς δόξης σου τὸν λαόν σου.

₁₄δὸς μαρτύριον τοῖς ἐν ἀρχῇ κτίσμασίν σου

καὶ ἔγειρον προφητείας τὰς ἐπ᾽ ὀνόματί σου·

₁₅δὸς μισθὸν τοῖς ὑπομένουσίν σε,

καὶ οἱ προφῆταί σου ἐμπιστευθήτωσαν.

₁₆εἰσάκουσον, κύριε, δεήσεως τῶν ἱκετῶν σου

κατὰ τὴν εὐλογίαν Ααρων περὶ τοῦ λαοῦ σου,

₁₇καὶ γνώσονται πάντες οἱ ἐπὶ τῆς γῆς

ὅτι κύριος εἶ ὁ θεὸς τῶν αἰώνων.

₁₈Πᾶν βρῶμα φάγεται κοιλία,

ἔστιν δὲ βρῶμα βρώματος κάλλιον.

₁₉φάρυγξ γεύεται βρώματα θήρας,

οὕτως καρδία συνετὴ λόγους ψευδεῖς.

₂₀καρδία στρεβλὴ δώσει λύπην,

καὶ ἄνθρωπος πολύπειρος ἀνταποδώσει αὐτῷ.

₂₁πάντα ἄρρενα ἐπιδέξεται γυνή,

ἔστιν δὲ θυγάτηρ θυγατρὸς κρείσσων.

₂₂κάλλος γυναικὸς ἱλαρύνει πρόσωπον

καὶ ὑπὲρ πᾶσαν ἐπιθυμίαν ἀνθρώπου ὑπεράγει·

₂₃εἰ ἔστιν ἐπὶ γλώσσης αὐτῆς ἔλεος καὶ πραΰτης,

οὐκ ἔστιν ὁ ἀνὴρ αὐτῆς καθ᾽ υἱοὺς ἀνθρώπων.

₂₄ὁ κτώμενος γυναῖκα ἐνάρχεται κτήσεως,

βοηθὸν κατ᾽ αὐτὸν καὶ στῦλον ἀναπαύσεως.

₂₅οὗ οὐκ ἔστιν φραγμός, διαρπαγήσεται κτῆμα·

καὶ οὗ οὐκ ἔστιν γυνή, στενάξει πλανώμενος.

₂₆τίς γὰρ πιστεύσει εὐζώνῳ λῃστῇ

ἀφαλλομένῳ ἐκ πόλεως εἰς πόλιν;

₂₇οὕτως ἀνθρώπῳ μὴ ἔχοντι νοσσιὰν

καὶ καταλύοντι οὗ ἐὰν ὀψίσῃ.