SIRACIDES 9

₁Μὴ ζήλου γυναῖκα τοῦ κόλπου σου

μηδὲ διδάξῃς ἐπὶ σεαυτὸν παιδείαν πονηράν.

₂μὴ δῷς γυναικὶ τὴν ψυχήν σου

ἐπιβῆναι αὐτὴν ἐπὶ τὴν ἰσχύν σου.

₃μὴ ὑπάντα γυναικὶ ἑταιριζομένῃ,

μήποτε ἐμπέσῃς εἰς τὰς παγίδας αὐτῆς.

₄μετὰ ψαλλούσης μὴ ἐνδελέχιζε,

μήποτε ἁλῷς ἐν τοῖς ἐπιχειρήμασιν αὐτῆς.

₅παρθένον μὴ καταμάνθανε,

μήποτε σκανδαλισθῇς ἐν τοῖς ἐπιτιμίοις αὐτῆς.

₆μὴ δῷς πόρναις τὴν ψυχήν σου,

ἵνα μὴ ἀπολέσῃς τὴν κληρονομίαν σου.

₇μὴ περιβλέπου ἐν ῥύμαις πόλεως

καὶ ἐν ταῖς ἐρήμοις αὐτῆς μὴ πλανῶ.

₈ἀπόστρεψον ὀφθαλμὸν ἀπὸ γυναικὸς εὐμόρφου

καὶ μὴ καταμάνθανε κάλλος ἀλλότριον·

ἐν κάλλει γυναικὸς πολλοὶ ἐπλανήθησαν,

καὶ ἐκ τούτου φιλία ὡς πῦρ ἀνακαίεται.

₉μετὰ ὑπάνδρου γυναικὸς μὴ κάθου τὸ σύνολον

καὶ μὴ συμβολοκοπήσῃς μετ᾽ αὐτῆς ἐν οἴνῳ,

μήποτε ἐκκλίνῃ ἡ ψυχή σου ἐπ᾽ αὐτὴν

καὶ τῷ πνεύματί σου ὀλίσθῃς εἰς ἀπώλειαν.

₁₀Μὴ ἐγκαταλίπῃς φίλον ἀρχαῖον,

ὁ γὰρ πρόσφατος οὐκ ἔστιν ἔφισος αὐτῷ·

οἶνος νέος φίλος νέος·

ἐὰν παλαιωθῇ, μετ᾽ εὐφροσύνης πίεσαι αὐτόν.

₁₁μὴ ζηλώσῃς δόξαν ἁμαρτωλοῦ·

οὐ γὰρ οἶδας τί ἔσται ἡ καταστροφὴ αὐτοῦ.

₁₂μὴ εὐδοκήσῃς ἐν εὐδοκίᾳ ἀσεβῶν·

μνήσθητι ὅτι ἕως ᾅδου οὐ μὴ δικαιωθῶσιν.

₁₃μακρὰν ἄπεχε ἀπὸ ἀνθρώπου, ὃς ἔχει ἐξουσίαν τοῦ φονεύειν,

καὶ οὐ μὴ ὑποπτεύσῃς φόβον θανάτου·

κἂν προσέλθῃς, μὴ πλημμελήσῃς,

ἵνα μὴ ἀφέληται τὴν ζωήν σου·

ἐπίγνωθι ὅτι ἐν μέσῳ παγίδων διαβαίνεις

καὶ ἐπὶ ἐπάλξεων πόλεως περιπατεῖς.

₁₄κατὰ τὴν ἰσχύν σου στόχασαι τοὺς πλησίον

καὶ μετὰ σοφῶν συμβουλεύου.

₁₅μετὰ συνετῶν ἔστω ὁ διαλογισμός σου

καὶ πᾶσα διήγησίς σου ἐν νόμῳ ὑψίστου.

₁₆ἄνδρες δίκαιοι ἔστωσαν σύνδειπνοί σου,

καὶ ἐν φόβῳ κυρίου ἔστω τὸ καύχημά σου.

₁₇ἐν χειρὶ τεχνιτῶν ἔργον ἐπαινεσθήσεται,

καὶ ὁ ἡγούμενος λαοῦ σοφὸς ἐν λόγῳ αὐτοῦ.

₁₈φοβερὸς ἐν πόλει αὐτοῦ ἀνὴρ γλωσσώδης,

καὶ ὁ προπετὴς ἐν λόγῳ αὐτοῦ μισηθήσεται.