CHAPITRE DÈS-E-VUECHEN 18

₁Aguènt parla 'nsin, Jèsu s'enanè 'mé si disciple de dela lou gaudre dóu Cedroun, Eila, i'avié 'n jardin; em'acò i'intrè, éu e si disciple.

₂Or, Judas, que lou trahissié, couneissié lou rode, car souvènti-fes Jèsu se i'èro rendu en coumpagno de si disciple.

₃Judas, adounc, aguènt pres la couorto e lis agènt fourni pèr li Prince di prèire e li Farisen, ié venguè 'mé de lanterno, de pegoun e d'armo.

₄Jèsu, pamens, sachènt tout ço que i'anavo arriba, s'avancè vers éli e ié diguè: Qu cercas?

₅Ié respoundeguèron: Jèsu de Nazarèt. Jèsu ié faguè: Es iéu. Or, Judas, que lou trahissié, i'èro peréu em'aquéli gènt.

₆Adounc, tre que Jèsu aguè di: Es iéu! reculèron e toumbèron au sòu.

₇Un segound cop ié demandè: Qu cercas? Éli diguèron: Jèsu de Nazarèt.

₈Jèsu respoundeguè: Vous ai di qu'es iéu; adounc, s'es iéu que cercas, leissas aquésti s'enana.

₉Èro pèr que fuguèsse coumplido la paraulo qu'avié dicho: D'aquéli que m'as douna, n'en ai perdu degun.

₁₀Alor Simoun-Pèire, qu'avié 'no espaso, la tirè, n'en mandè 'n cop sus lou varlet dóu grand-prèire e ié coupè l'auriho drecho. A-n-aquéu varlet ié disien Màrcus.

₁₁Mai Jèsu diguè à Pèire: Tourno toun espaso au fourrèu. Lou calice que m'a douna moun Paire, es que lou béurai pas?

₁₂La couorto, adounc, e lou tribun, emai lis agèntdi Judiéu agantèron Jèsu e l'estaquèron.

₁₃E l'aduguèron proumié vers Ano: èro, aquest, lou sogre de Caïfo, grand-prèire d'aquelo annado.

₁₄Es Caïfo qu'avié douna 'quest counsèu i Judiéu: Vau mai qu'un soulet ome more pèr lou pople.

₁₅Pamens, Simoun-Pèire seguissié Jèsu, em' un autre disciple. Aquest disciple èro couneigu dóu grand-prèire, em' acò intrè 'mé Jèsu dins l'escour dóu grand-prèire.

₁₆Mai Pèire se tenié contro la porto, pèr deforo. Alor sourtiguè l'autre disciple, aquéu qu'èro couneigu dóu grand-prèire, parlè à la pourtiero e faguè intra Pèire dedins.

₁₇Em'acò diguè à Pèire, la servicialo que fasié la pourtiero: E tu, n'en siés pas, di disciple d'aquel ome d'aqui? Éu respoundeguè: N'en siéu pas.

₁₈Li varlet e lis agènt se tenien contro un fiò de carboun, dóumaci fasié fre, e se caufavon. Pèire tambèn se trouvavo em'éli, en trin de se caufa.

₁₉Pamens, lou grand-prèire questiounè Jèsu sus si disciple e sus sa dóutrino.

₂₀Ié respoundeguè Jèsu: léu ai parla publicamen au mounde; iéu de-countùni ai ensigna dins la sinagogo e dins lou tèmple, ounte tóuti li Judiéu s'acampon, e n'ai rèn di d'escoundoun.

₂₁Perqué me questiounas? Demandas i gènt que m'an entendu, ço que i'ai di à-n-éli; aquéli sabon ço que iéu ai di.

₂₂Coume aguè parla, un di gàrdi, qu'èro aqui, mandè 'n gautas à Jèsu, en disènt: Es ansin que respondes au grand-prèire?

₂₃Jèsu ié venguè: S'ai mau parla, fai vèire ço qu'ai di de mau; mai, s'ai bèn parla, coume vai que me piques?

₂₄Em'acò lou mandè encadena vers Caïfo, lou grand-prèire.

₂₅Or, Simoun-Pèire èro aqui en trin de se caufa. D'ùni ié venguèron dounc: N'en siés pas, tu peréu, de si disciple? Diguè de noun, éu, e faguè: N'en siéu pas.

₂₆Alor un di serviciau dóu grand-prèire, parènt d'aquéu que Pèire i'avié coupa l'auriho, ié diguè: Es que iéu t'ai pas vist dins lou jardin em'aquel ome?

₂₇Tourna-mai Pèire diguè de noun; e subran lou gau cantè.

₂₈Adounc menèron Jèsu de vers Caïfo au pretòri. Èro lou matin, e noun intrèron éli dins lou pretòri, cregnènço d'èstre impur e de pas pousqué manja la Pasco.

₂₉Pilato venguè dounc, vers éli deforo, e diguè: Quinto acusacioun pourtas contro aquel ome?

₃₀Ié respoundeguèron: Se n'èro pas un maufatour, l'aurian pas remés entre vòsti man.

₃₁Pilato ié diguè: Prenès-lou, vautre, e d'après vosto lèi jujas-lou. Mai ié diguèron li Judiéu: Avèn pas lou dre de faire mouri quaucun.

₃₂Èro pèr que s'acoumpliguèsse la paraulo que Jèsu avié dicho, quand avié marca de quinto mort devié mouri.

₃₃Pilato intrè dounc tourna-mai dins lou pretòri, sounè Jèsu, e ié diguè: Sias, vous, lou rèi di Judiéu?

₃₄Jèsu respoundeguè: Es de voste sicap que disès acò-d'aqui, o bèn d'autre vous l'an di de iéu.

₃₅Ié rebriquè Pilato: Es que iéu siéu Juei? Vosto nacioun, e li Prince di prèire vous an remés entre mi man; dequ'avès fa?

₃₆Jèsu respoundeguè: Moun reiaume noun es d'aquest mounde. S'èro d'aquest mounde, moun reiaume, mi serviciau se sarien batu pèr que noun toumbèsse entre li man di Judiéu. Mai moun reiaume n'es pas d'eiçavau.

₃₇Pilato alor ié diguè: Adounc sias rèi, vous? Respoundeguè Jèsu: L'avès di, siéu rèi, iéu. Veici perqué siéu na, e perqué siéu vengu dins lou mounde: es pèr rèndre testimòni à la verita. Quau es de la verita escouto ma voues.

₃₈Ié diguè Pilato: Dequ'es la verita? E aguènt parla 'nsin, sourtiguè mai pèr trouva li Judiéu, e ié diguè: Iéu trove rèn à juja dins aquel ome.

₃₉Mai es la coustumo pèr Pasco, que vous remete quaucun en liberta. Voulès dounc que vous remete lou rèi di Judiéu?

₄₀Tóuti alor se boutèron tourna-mai à crida, disènt: Noun, pas éu, mai Barrabas. Or, Barrabas èro un escapoucho.