Tchaip. XXIII. 23

₁Ailours Djîsus paila au peupye et peu ai sas discipyes,

₂Et peu leû dit: Las scribes et peu las pharisiens sont setas desus lai tchére de Moïse.

₃Obsarvâz don, et peu fâtes tout ce qu’es vos disant: main ne fâtes pais ce qu’es fant; paiche qu’es disant ce qu’è faut fâre, et peu qu’es ne lou fant pais.

₄Es loûaillant das faidgés besants et peu însupoûetchâbyes, et peu las boutant desus lou dôs das hoummes; et peu es ne vyant pais las brânnas di bout di doigt.

₅Es fant toutes leux aictions pou étre vus das hoummes: ç’ost pouquoi es poûetchant las pairoûles de lai loi écrites desus das longs moûtchés de pairtchemîn pus lârdges que las autres, et peu ant aitou das frandges pus lârdges ai leux roubes.

₆Es ainmant las piaices d’hounneu ai tôbye, et peu las preméres tchéres dans las synaigougues.

₇Es ainmant que las autres las sailuant dans las piaices pubyiques, et peu que las hoummes las aippelant rabbi ou bîn douteus.

₈Main pou vous, ne souhaitâz pont qu’on vos aippeulle rabbi ou bîn douteus; paiche que vos n’ez qu’în seul mâtre ou bîn douteu, et peu que vos ez tretous fréres.

₉N’aippelâz aitou nun desus lai târe vôte pére; paiche que vos n’ez qu’în Pére qu’ost dans lou cîl.

₁₀Peu qu’on ne vos aippeulle pont mâtres ou bîn conducteus, paiche que vos n’ez qu’în mâtre ou bîn conducteu, qu’ost lou Christ.

₁₁C’tu qu’ost lou pus grand entremé vous, serai vôte sarviteu.

₁₂Paiche que qu que ce sait que s’éleverai serai aibâssie; et peu qu que ce sait que s’aibâsserai, serai éleva.

₁₃Main mâlheu ai vous, scribes et peu pharisiens hypôcrites, paiche que vos foûèrmâz as hoummes lou royaume di cîl: vos n’y entrâz pont vous‐mainmes, et peu vos vous ôpôsâz encoûe ai ceux que souhaitant d’y entra.

₁₄Mâlheu ai vous, scribes et peu pharisiens hypôcrites, paiche que vos fâtes sembiant de bîn pria, et peu que vos dévôriz las môsons das veuves; ç’ost pou çouqui que vos receudriz în djudgement pus dur.

₁₅Mâlheu ai vous, scribes et peu pharisiens hypôcrites, paiche que vos coûerâz lai mâ et peu lai târe pou fâre în éleuve; et peu aiprés que l’ost deveni, vos lou rentes digne de l’enfâ doue fois pus que vous.

₁₆Mâlheu ai vous, conducteus aiveuyes, que dites: Se în houmme djure pai lou tempye, ne ç’ost ran; main qu que ce sait que djure pai l’oue di tempye, ost ôblidgie ai son sarment.

₁₇Imbéciles et peu aiveuyes que vos ez! louqué det‐on pus vanta, ou bîn l’oue, ou bîn lou tempye que sanctifie l’oue?

₁₈Peu se în houmme, dites‐vous, djure pai l’autel, ne ç’ost ran; main qu que ce sait que djure pai lou don qu’ost desus l’autel, ost ôblidgie ai son sarment.

₁₉Aiveuyes que vos ez! louqué det‐on pus vanta, ou bîn lou don, ou bîn l’autel que sanctifie lou don?

₂₀Ç’tu don que djure pais l’autel, djure ai lai fois pai l’autel et peu pai tout ce qu’ost desus.

₂₁Peu qu que ce sait que djure pai lou tempye, djure pai lou tempye et peu pai c’tu qu’y demoûere.

₂₂Peu c’tu que djure pai lou cîl, djure pai lou trône de Due, et peu pai c’tu qu’y ost seta.

₂₃Mâlheu ai vous, scribes et peu pharisiens hypôcrites, que paiyâz lai dîme de lai menthe, de l’aineth et peu di cizot, et peu qu’ez aibandena ce qu’è y ait de pus conséquent dans lai loi, ç’ost‐ai‐dire, lai djustice, lai miséricoûedge et peu lai foi. Voiqui las tchoses qu’è faillai praitiqua, sans cepoûetchant œubia las autres.

₂₄Conducteus aiveuyes, qu’ez bîn soin de péssa ce que vos beuviz, de pau d’aivôla în moûetcheron, et peu qu’aivôlâz ne tchaimalle.

₂₅Mâlheu ai vous, scribes et peu pharisiens hypôcrites, paiche que vos notoûèyiz lou foue di voirre et peu di piat, et peu que vos ez dans lou fond pions de voulerie et peu de sâlitude.

₂₆Pharisien aiveuye, quemençâz pai notoûèyie lou dedans di voirre et peu di piat; aifîn que lou foue en sait poupre aitou.

₂₇Mâlheu ai vous, scribes et peu pharisiens hypôcrites, paiche que vos ez sembiâbyes ai das tombeaux biantchis, que de foue sembiant bés as œûils das hoummes; main que sont pions i dedans d’oues de moue, et peu de toute soûtche de peurriture.

₂₈Vous aitou de foue vos sembiâz djustes as œûils das hoummes; main i dedans vos ez pions de fausseté et peu d’îndjustice.

₂₉Mâlheu ai vous, scribes et peu pharisiens hypôcrites, que bâtissâz das tombeaux as prôphétes, et peu ournâz las mônuments das djustes,

₃₀Peu que dites: Se nos sîns aivu di temps de nos péres, nos ne nous serîns pais djoints ai ioux pou voûetcha lou sang das prôphétes.

₃₁Vos vous rentes dînquîn témoignaidge ai vous‐mainmes, que vos ez las offants de ceux qu’ant tua las prôphétes.

₃₂Aitchevâz don aitou de combia lai mesure de vos péres.

₃₃Sarpents, raices de vipéres, quement pourriz‐vous évita d’étre condânna au fue de l’enfâ?

₃₄Ç’ost pouquoi i m’en vais vos envie das prôphétes, das saidges et peu das scribes; et peu vos tueriz las ûns, vos creucifieriz las autres, vos en foûetteriz das autres dans vos synaigougues, et peu vos las persécuteriz de ville en ville;

₃₅Aifîn que tout lou sang înnôcent qu’ost aivu voûetcha su lai târe retchouse desus vous, deu lou sang d’Abel lou djuste djûnsqu’au sang de Zaicharie, c’tu de Baraitchie, que vos ez tua entremé lou tempye et peu l’autel.

₃₆I vos dis pou di sûr, tout çouqui vînrai tchoûre desus c’te raice qu’ost aujed’heu.

₃₇Djîrusâlem, Djîrusâlem, que tues las prôphétes, et peu qu’éreutches ceux que sont envies vés toi, coubîn de fois a‐ye vyu raitroupa tas offants, coumme ne dgeleunne raitroupe sas poussîns desous sas éles, et peu te ne l’ais pais vyu!

₃₈Lou temps s’aippreutche que vôte môson demoûererai desâtche.

₃₉Paiche qu’i vos déquiâre que vos ne me vôriz pus mâsheu, djûnsqu’ai ce que vos disîz: Beni sait c’tu que vînt au nom di Seigneu.