II Thessalonied 1

₁Paol, Silvan ha Timoteus, da Iliz an Thessalonied pehini a zo en Doue hon Tad, hag en Aotrou Jesus‐Christ. ₂Gras deoc’h ha peoc’h digant Doue an Tad, hag an Aotrou Jesus‐Christ.

₃Trugarekaad a dleomp Doue bepred evidoc’h, breudeur, evel ma’z eo deread, pa’z eo gwir e cresk meurbed ho feiz, ha ma teu da veza brassoc’h ho karantez holl an eil e‐kenver egile, ₄en hevelep doare ma tennomp gloar ac’hanoc’h en Ilizou Doue, abalamour d’ho patianted ha d’ho feiz en hoc’h holl bersecutionou hag en afflictionou a c’houzanvit, ₅ar pez a zo eur breuven euz ar varnedigez just a Zoue, evit ma veot rentet dign euz a rouantelez Doue, evit pehini e c’houzanvit. ₆Rag just eo dirag Doue, ma rentfe affliction d’ar re a afflij ac’hanoc’h, ₇ha ma rofe deoc’h‐hu pere a zo afflijet, ar repos ganeompni, pa zeuio an Aotrou Jesus‐Christ euz an env gant elez he c’halloud, e‐kreiz flammoutan, ₈evit tenna venjans euz ar re na anavezont ket Doue, ha na zentont ket ouz Aviel hon Aotrou Jesus‐Christ. ₉Souffr a raint ho funition, eur gollidigez eternel, pell euz a brezans an Aotrou, hag euz ar gloar euz he c’halloud; ₁₀pa zeuio en devez‐ze, da veza glorifiet en he zent, ha da veza admiret er re holl ho devezo credet; (rag c’houi hoc’h euz credet d’hon testeni.) ₁₁Abalamour da ze ive, ni a bed heb ehan evidoc’h, evit ma teui hon Doue d’ho renta dign euz ar vocation hoc’h euz bet, ha da accomplissa gant nerz enoc’h an holl sonjezonou mad euz he vadelez, hag œuvr ar feiz; ₁₂evit ma vezo hano hon Aotrou Jesus‐Christ glorifiet enoc’h, ha c’houi enhan, hervez gras hon Doue, hag hon Aotrou Jesus‐Christ.