Matteiu 19

₁E quandu Ghiesù ebbe finitu sti discorsi, si n’ andò da la Galilea a li cunfini di la Ghiudea al di là di lu Ghiurdanu,

₂E lu seguitonu molte ghienti, e li guarì culà.

₃E s’ avvicinonu ad ellu i Farisei per tentallu, dicendu: È mica permessu a l’ omu di mandà via la moglie, per una causa qualunque?

₄Ed ellu li rispose: Nun avete lettu, che quellu, che ha fattu l’ omu da principiu, li fece masciu e femina? e disse:

₅Per questu l’ omu abbandunarà lu babbu, e la mamma, e starà strintu a la so moglie, e sarannu dui in una carne.

₆Perciò nun so’ più dui, ma una carne. Adunque che l’ omu nun divida ciò, che Diu ha unitu.

₇Li dissinu: Ma per cosa Musè urdinò di dà lu libellu di lu ripudiu, e di dividasi?

₈Ellu li disse: Per via di la durezza di lu vostru core Musè vi permisse di mandà via le vostre mogli: ma da principiu nun era cusì.

₉Ma eiu vi dicu: Quellu, che mandarà via la moglie, se non per causa d’ adulteriu, e si ne pigliarà un’ altra, cummette un adulteriu: e quellu, che piglia la donna mandata via, cummette un adulteriu.

₁₀Allora li so’ discipuli li dissinu: Se quessa è la cundizione di l’ omu cun la donna, nun torna a contu a maritassi.

₁₁Ellu li disse: Nun capiscunu tutti sta parola, ma sulamente quelli, a li quali è statu datu di capilla.

₁₂Perchè ci so’ di l’ eunuchi, che so’ nati cusì da lu corpu di le so’ mamme: ci so’ di l’ eunuchi, che so’ stati fatti da l’ omi: e ci so’ di l’ eunuchi, che si so’ castrati da per elli per guadagnà lu regnu di li celi. Che quellu, che po capì, capisca.

₁₃Allora li funu presentati di li chiucarelli, per ch’ ellu l’ impunisse le mani, e pregasse. E li so’ discipuli li rimpruvaravanu.

₁₄Ma Ghiesù li disse: Lasciate in pace li picculi, e nun l’ impedite di vena pressu di me: perchè lu regnu di li celi è a sti tali.

₁₅E dopu avelli impostu le mani, si n’ andò da culà.

₁₆Ed eccu che unu avvicinandusi, li disse: Bon Maestru, cosa putragghiu fà di bè per avè la vita eterna?

₁₇Ellu li disse: Per cosa m’ interrugheghi su lu bè? Unu solu è bonu, Iddiu. Se poi tu voi intrà in la vita, usserva li cumandamenti.

₁₈E quali so’, disse quellu? Ghiesù rispose: Nun farè umicidiu: Nun farè adulteriu: Nun farè latruciniu: Nun farè lu falsu tistimoniu:

₁₉Unora lu to babbu, e la to mamma, e teni caru lu to prossimu come te stessu.

₂₀Lu ghiuvinottu li disse: Agghiu fattu tutte ste cose fin da la me ghiuventù: cosa mi tocca ancora da fà?

₂₁Ghiesù li disse: Se tu voi essa perfettu, vai, vendi quellu, che tu hai, e dallu a li povari, ed aurè un tesoru in lu celu: e veni, e seguiteghiami.

₂₂Quandu lu ghiuvanottu intese ste parole, si n’ andò tuttu tristu: perchè pussidia molti beni.

₂₃E Ghiesù disse a li so’ discipuli: Vi dicu in verità, un riccu intrarà difficilmente in lu regnu di li celi.

₂₄E vi tornu a dì: È più facile ad un camellu di passà per la cruna d’ un agu, che ad un riccu d’ intrà in lu regnu di li celi.

₂₅E li discipuli sintendu ste cose, si maravigliavanu assai, dicendu: Qual è quellu, che si putrà salvà?

₂₆E Ghiesù guardanduli, li disse: Pressu di l’ omi è impussibile: ma pressu di Diu tutte le cose so’ pussibili.

₂₇Allora Petru rispundendu, li disse: Eccu, noi avemu lasciatu tuttu, e ti avemu seguitatu: cosa sarà dunque di noi?

₂₈E Ghiesù disse ad elli: Vi dicu in verità, voi, che mi avete seguitatu, nela righienerazione, quandu lu Figliolu di l’ omu pusarà sopra lu tronu di la so maiestà, pusarete anche voi sopra dodici sedi, ghiudicandu li dodici tribù d’ Isdraellu.

₂₉E quellu, che lasciarà la so casa, o li so’ fratelli, o le surelle, o lu babbu, o la mamma, o la moglie, o li figlioli, o li so’ chiosi per lu me nome, ricivarà centu volte di più, e pussidirà la vita eterna.

₃₀E molti di li primi sarannu ultimi, e molti ultimi sarannu primi.