1 Tesalonisianuri 5

₁Pe so si e vramia ai kana avela, či trubul tumen, phralale, te ramosaras tumenge. ₂Ke vi tume žianen ke o Dies le Baresko avela sar jekh čor ande e riat. ₃Kana le manuš phenena: Patia ai mišto, atunči jekh phařaimos avela pe lende, sar le dukha kai len la žiuvlia kana avela la glata, ai von či skipina pe. ₄Numa tume, phralale, tume či san ande o tuniariko, sar ke te o dies lel tumen sar jekh čor; ₅tume san sa glati la vediarake ai glati le dieseske. Ame či sam la riatiake či le tuniarikoske. ₆Na soven sar le kaver, numa te las sama ai te na avas mate. ₇Ke kudala kai soven e riat, ai kudala kai mation e riat. ₈Numa ame kai sam le dieseske, te na avas mate, liam pe amende le tsalia sastrune le patiamaske ai la milake, ai si ame t'ažiukeras o skipimos. ₉Ke o Del či šinadias amen pe e xoli, numa te kjinas o skipimos katar amaro Rai o Jesus Kristo, ₁₀kai mulo amenge, eta ke, t'avela ke ame las sama, t'avela ke mai sovas, ame te traisaras lesa. ₁₁Sa anda kudia vazden tume jekh avres, ai zuriaren tume jekh kavres, sar tume čačes keren.

₁₂Ame řudjisaras tumen, phralale, te len sama kudalenge kai keren butji maškar tumende, kai ningerel tumen ande o Baro, ai kai vazdel tumen opre. ₁₃T'avel tumenge but mila ai dragostia lendar, pala lenge butia. T'aven ande e patia savořensa.

₁₄Ame mai řudjisaras tume, phralale, phenen kudalenge kai či train mišto, t'avel tumenge mila katar kudala kai pele tele, vazden le kovlen, t'avel tumen vramia karing sa. ₁₅Len tume sama ke khonik te del palpale o nasulimos katar o nasulimos; numa našen sakda pala o mištimos, t'avela maškar tumende, t'avela angla sa.

₁₆Aven sakda veseli. ₁₇Řudjin bi te muken tume. ₁₈Naisin ande sako diela, ke kudia si so kamel o del karing tumende ande o Jesus Kristo.

₁₉Na mudaren le Duxos. ₂₀Na vuřitsin le profeton. ₂₁Numa len sama sako diela; ninkeren so si mišto; ₂₂len tume sama katar sako nasulimos.

₂₃Ke o Del la patiako te svintsil tumen vo sa intrego, ai ke sa tumaro stato, o gindo ai o duxo, t'aven garade bi-došake, kana avela amaro Rai o Jesus Kristo! ₂₄Kudo kai akhardias tumen si čačo, ai vo kudia kerela.

₂₅Phralale, řudjin amenge.

₂₆Den pozdraimos sa le phralen jekhe svinto čimidimasa.

₂₇Me mangav tumen katar o Baro, ke kado lil t'avel gjindo ka sa le phral.

₂₈Ke e dragostia katar amaro Rai o Jesus Kristo t'ašel tumensa!