Apostoli 9

₁Numa o Saul, mai phurdelas e dar ai o merimos pe le vortača le Bareske, gelo ka o baro rašai židovitsko, ₂ai manglias lestar lila pe le khangeria židovitsko ande o Damasko, eta ke, t'avela varekon katar o nevo zakono, murš vai žiuvli, t'anel len phangle ande o Jerusalem.

₃Sar vo sas pe e vurma, ai ke vo pašiolas paša o Damasko, anda jekh data jekh vedaria avili anda o čeri ai strefialas krugom lestar. ₄Vo pele pe e phuv, ai vo ašunelas jekh hango kai phenelas leske: Saul, Saul, sostar kjinuis ma tu?

₅Vo del palpale: Kon san tu, Baria?

Ai o Baro phenel: Me sim O Jesus kai tu kjinuis. ₆Ai o Baro phenel leske: Ušti, de ande o foro, ai phenena tuke so trubul tu te keres.

₇Le manuš kai sas lesa sas lenge šodo; von ašunenas mišto o hango, numa von či dikhenas khanikas. ₈O Saul uštilo pa e phuv, ai, makar ke leske jakha sas puterde, vo či dikhel khanči; line les vastestar, mai ningerde les ande o Damasko. ₉Vo bešlo trin diesa bi te dikhel, ai vo či xalias ai či pilias.

₁₀Eta, sas ande o Damasko jekh vortako bušolas Ananias. O Baro phenel leske ande jekh suno: Ananias!

Vo del palpale: Eta me, Baria!

₁₁Ai o Baro phenel leske: Ušti, žia ande e vulitsa kai akharen la e Vorta, ai rode, ande o kher katar o Juda, jekhes kai bušol Saul anda o Tarsus. Vo řudjil, ₁₂ai vo dikhlias sar suno jekhe manušes kai bušol Ananias, kai delas andre, ai kai thodias pe leste le vast, eta te puterdion leske jakha. ₁₃O Ananias del palpale: Baria, me ašundem katar but žene sa o nasulimos ke kudo manuš kerdias te svintsonge ande o Jerusalem; ₁₄ai si kathe e putiaria, katar le bare raša židovitsko, te phandel sa kudalen kai phenen tjiro anav.

₁₅Numa o Baro phenel leske: Žia, ke kudo manuš trubula man ai me alosardem les te ningerel muřo anav angla le thema, angla le amperatsi, ai angla le šiave katar o Israel; ₁₆ai me sikavava leske sa sogodi vo trubul te kjinuil pala muřo anav.

₁₇O Ananias anklisto avri; ai, kana vo areslo ande o kher, vo thodias le vast pe o Saul, phenelas: Saul muřo phral, o Rai o Jesus, kai sikadilo tuke pe e vurma katar tu avesas, tradias ma te putrav tjire jakha ai t'aves pherdo Svinto Duxo. ₁₈Strazo, pele pa leske jakha sar babitsi, ai leske jakha puterdile. Vo uštilo, ai bolde les; ₁₉ai, pala ke lias te xal, e zor avili leske.

O Saul bešlo uni diesa le vortakonsa kai sas ande o Damasko. ₂₀Ai strazo vo del duma ande le khangeria židovitsko ke o Jesus si o Šiav le Devlesko.

₂₁Sa kudala kai ašunenas leste sas lenge šodo, ai von phenenas: Nai vo kudo kai kjinuilas ande o Jerusalem kudalen kai phenenas o anav le Jesusosko ai či avilo vo kathe te ningerel le phangle ka le bare raša židovitsko?

₂₂Numa o Saul zuriavolas but ai mai but, ai vo sikavel le Židovonge kai bešenas ande o Damasko kai šibin pe, sikavelas lenge ke o Jesus si o Kristo.

₂₃Kana nakhlias jekh tsiřa vramia, le Židovuri dine pe duma te mudaren les, ₂₄ai so von kamenas te keren ašundias kudia o Saul. Arakhenas le vudara diese ai riate, eta te len lesko traio. ₂₅Numa, ande jekh riat, le vortača line les, ai vuliarde les pa o zido, ande jekh košnitsa.

₂₆Kana vo gelo ande o Jerusalem, o Saul zumadias t'astardiol lensa numa sa daranas lestar, či patianas pe ke vo si jekh vortako. ₂₇Atunči o Barnabas, lias les pesa, ningerdias les karing le apostoli, ai phenel lenge sar pe e vurma o Saul dikhlias le Bares, kai dias duma lesa, ai sar ande o Damasko vo dias duma čačimasa ande o anav le Jesusosko. ₂₈Vo žialas ai avelas lensa ande o Jerusalem, ai phenelas bi darako ande o anav le Baresko. ₂₉Vo mai delas duma ai sas les čingar le Židovonsa kai den duma grekitsko; numa kudala rodenas te lel lesko traio. ₃₀Le phral ašunde, ningerde les ande o Tsesarea, ai kerde te žialtar ande o Tarsus.

₃₁E khangeri sas ande e patia ande sa e Judea, e Galilea ai e Samaria, zuriavolas ai phirelas ande e dar le Bareski, ai von butionas ke ažutilas len o Svinto Duxo.

₃₂Sar o Petri žialas ka sa o them vo vi mai vulisto karing kudala svintsi kai bešenas ande o Lida. ₃₃Vo arakhlias jekhe manušes bušolas Eneas, sovelas pe jekh pato de oxto berš, ai sas paralitiko. ₃₄O Petri phenel leske: Eneas, o Jesus Kristo sastiarel tu; ušti, ai lašiar tjiro pato. Ai vo strazo vuštilo. ₃₅Sa o narodo anda o Lida ai anda o Saron dikhle les, ai von pařudisaile ka o Baro.

₃₆Sas ande o Jope, maškar le vortača, jekh žiuvli bušolas Tabita (kudia si gazela): Voi kerelas but butia laše ai ažutilas le čořen.

₃₇Voi peli nasvali ande kudia vramia, ai muli. Pala ke xalade le, thodine la ande jekh soba opre. ₃₈Sar o Lida si paše paša o Jope, le vortača, kana ašunde ke si kothe o Petri, tradine do manušen karing leste, te řudjil les t'avel lende bi te mai ažiukerel. ₃₉O Petri uštilo, ai gelotar kudala manušensa. Kana vo areslo, ningerde les ande e soba opre. Sa le phivlia sas krugom lestar roimasa, ai sikaven leske le bundi ai le tsalia kai suvelas e Tabita žikin sas lensa. ₄₀O Petri dias avri savořen, thodias pe ande čangende, ai řudjil, vo phenel: Tabita, ušti! Voi puterdias le jakha, dikhlias le Petri, ai voi bešel. ₄₁Vo del la o vast, ai kerdias te uštel. Vo atunči akharel le svintson ai le phivlian, ai sikavel la lenge živindi. ₄₂Žianglias kadia sa o Jope, ai but patian ande o Baro. ₄₃O Petri bešlo tsiřa vramia ande o Jope, ka jekh mortsari.