Kolosianuri 1

₁Lil katar O Paul, apostolo katar o Jesus Kristo sar kamel o Del, ai o phral Timoteo, ₂ka le svintsi ai čače phral ande o Kristo kai si ande o Koloso; ke o mištimos ai e patia t'aven tumenge dine katar o Del amaro Dad!

₃Ame naisaras sakda le Devles, o Dad amare Baresko o Jesus Kristo, ai ame či mukas ame te řudjisaras tumenge, ₄ašundiam tumaro patiamos ande o Jesus Kristo ai tumari mila sa le svintsonge. ₅E vorba le čačimaski katar e Laši Viasta avili e mai angluno data tumenge kerdias te žianen o ažiukerimos kai ši tumenge šinado kadia tumaro patiamos ai tumaro kamimos si pe tume ažiukeren kai si thodo rigate tumenge ande a čeri. ₆Vo si maškar tumende, ai ande sa e lumia; vo ninkerel e fruta, ai vo žial mai baro, sa vi si maškar tumende, de katar o dies kai tume ašundian ai žianglian o mištimos le Devlesko sar čačimos, ₇sar tume sikilian ai lian katar o Epafras, amaro drago vortako ande e služetsia, kai si amenge jekh čačo ministero ande o Kristo, ₈ai kai phendias amenge savo dragostia milako si ande tumaro duxo.

₉Sa anda kudia ke vi ame, de katar o dies kai ame ašundiam, ame či mukas ame te řudjisaras le Devles tumenge, ai te mangas te pherel o Del tumen e godiasa te žianen so vo kamel, ande sa o godiaverimos ai hatiarimos kai del lesko Duxo, ₁₀te phiren vorta harniči ande o Baro ai t'aven leske dragi, tume kerena sako fialo laše butia ai žiana mai angle ande so tumen žianen le Devlesa, ₁₁zuriarde sako fialo katar leski zor vestime, kadia t'aven sakda ai veselimasa te ninkeren ai te ažiukeren. ₁₂Naisin le Dades, kai kerdias anda tumende harniči te len partia katar so ažiukeren le le svintsi ande e vedaria, ₁₃kai skipisardias amen katar e zor anda o tuniariko ai ningerdias ame ande e amperetsia le Šiaveski katar lesko kamimos, ₁₄ande kaste si ame o skipimos ai o jertimos le bezexango.

₁₅Vo si o vobrazo le Devlesko kai či dikhiol, o mai angluno arakhado. ₁₆Ke ande leste si kerde sa le dieli kai si ande o čeri ai pe e phuv, so tume dikhen ai so či dikhen, putiaria duxoske, bare so porončin, rai bare. Sa si thodino lestar ai leske. ₁₇Vo sas angla savořende sa le dieli, ai sa le dieli bešen ande leste. ₁₈Vo si o šero katar o stato kai si e khangeri; vo si o gor, o mai angluno arakhado ande le mule, eta t'avel o mai angluno anda sa. ₁₉Ke o Del kamlias te bešel sa o mištimos ande leste; ₂₀vo kamlias te lašiarel sa pesa, sogodi si pe e phuv ke sogodi si ande o čeri, kai kerel e patia lestar, katar o rat katar lesko trušul.

₂₁Ai tume, kai sanas angla savořende streia ai dušmaia katar tumare ginduri ai katar tumare žiungale butia, ₂₂o Del akana thodias tumen ande jekh than lesa katar o merimos pesko šiavesko ande pesko stato phuviako, t'aven angla leste svintsi, vuže ai bi-došake, ₂₃te si te bešen tume zurales ai te na miškin tumen anda o patiamos bi t'ambolden tume katar o ažiukerimos kai dias tumen e Laši Viasta kai tume ašundian, kai sas phendi ka sako so arakhadilo tela o čeri, ai me o Paul, kerdilem laki sluga.

₂₄Me veseli ma akana ande muře dukha pala tumende; ke ande so mai trubul ka le kjinuimata le Kristoske ande lesko stato, me getov le ande muřo mas, kai si e Khangeri. ₂₅Si latar ke me sim thodino sluga, sar si e butji kai o Del dias ma paša tumende, eta te phenav sar mai mišto e vorba le Devleski, ₂₆e čudenia garadi anda sa e vramia ai ande le berš, numa sikadi akana ka le svintsi, ₂₇kudaleske o Del kamlias te žianen sar si o vestime barvalimos anda kudia čudenia maškar kudala kai či patian, te žianen: O Kristo del tumen ažiukerimos ai vestia. ₂₈Pa leste ame phenas, vazdas sako manušes, ai sikiaras sako manušes ande sa e godji kai o Del dias amen, eta te sikavas ka o Del sako manušes, t'avel lašio ande jekh than le Kristosa ande peske beršengo. ₂₉Ande kudia me kerav butji ai marav ma, leska zorasa kai kerel zurales ande mande.