Filipian 4

₁Sa anda kudia, muře kuč dragi ai muře pria kuč phralale, tume kai san muři veselia ai muři kurona, bešen kadia zurales ande o Baro, muře kuč dragi!

₂Me mangav e Evodi ai e Sintixi t'avel len jekh fialo gindo ande o Baro. ₃Ai vi tu, čačo vortako, e, řudjiv tu t'ažutis le, von kai marde pe pala e Laši Viasta mansa, le Klementosa ai le kavrensa muře vortača ande e butji, kai lenge anava si ande e kliška le traioski.

₄Veselin tume sakda ande o Baro; mai phenav tumenge, veselin tume.

₅Ke tumaro guglimos te žianen les sa le manuš. O Baro si paše. ₆Te na daran khančestar; numa anda sa le dieli keren te žianel o Del so trubul tumen katar le řudjimata ai le mangimata, te naisin les. ₇Ai e patia le Devleski, kai si mai but sar sa le godia, arakhela tumare ile ai tumare ginduri ande o Jesus Kristo.

₈So mai si, phralale, ke sa so si čačo, sa so si pativalo, sa so si vorta, sa so si vužio, sa so si drago, sa so si vestime, ai sa so si harniko trubul te pheren tumare ginduri. ₉So tume sikilian, lian ai ašundian mandar, ai so tume dikhlian ande mande, keren kadia. Ai o Del la patiako avela tumensa.

₁₀Me lem bari veselia ande o Baro anda sar ke tume neviardian tumare ginduri pe mande; tume mišto dian tume godji, numa naštinas te keren kudia angla savořende. ₁₁Nai ke trubul man vareso ke me phenav kadia, ke me sikilem t'avel mange mišto sar me sim. ₁₂Me žianav te traiv ande o kovlimos, ai me žianav te traiv ande o but. Ande sa ai kai-godi me sikilem t'avav pravardo ai t'avav bokhalo, t'avav ande so si but ai t'avav ande so si tsiřa. ₁₃Me šai kerav sa katar kudo kai del ma zor. ₁₄Numa tume mišto kerdian ke si tumen partia ande muřo nekazo.

₁₅Tume inke žianen, Filipianuri, anda o gor kai den duma pa e Laši Viasta, kana me gelemtar anda e Makedonia, či jekh Khangeri či gjinde mansa so von line ai so von dine. ₁₆Tume ferdi dian, ke tume tradianas man ande e Tesaloniki, ai duvar, so šai trubulas man. ₁₇Nai ke me rodav ferdi tumen te den ma podarki; numa me rodav but dobinda te dav tumen. ₁₈Me sa lem, ai man si ma but; me sim pherdo mištimos, kai lem katar o Epafrodito so avilo tumendar sar jekh duxi kai khandel šukar, jekh sakrifiso kai o Del lel, ai kai si leske drago. ₁₉Ai muřo Del dela tumen so trubul savořen sar si lesko barvalimos, veselimasa, ande o Jesus Kristo. ₂₀Ka amaro Del ai Dad t'avel vestime berš beršestar! Amen!

₂₁Den pozdraimos sa le svintson ande o Jesus Kristo. Le phral kai si mansa den tumen pozdraimos. ₂₂Sa le svintsi den tume pozdraimos, ai sar mai but kudala katar o kher o Tsesaresko.

₂₃Ke o mištimos katar o Rai Jesus Kristo t'avel tumare duxosa!