Kolosianuri 4

₁Birevia, den ka tumare služi so si vorta ai mišto, te žianen ke vi tume si tume birevo ande o čeri.

₂Ninkeren ande o řudjimos, len sama le mištimasa, ₃řudjin sa kadia amenge, eta ke o Del te putrel jekh vudar la vorbake, kadia te šai phenas e čudenia le Kristoski, pala kaste me sim phanglo, ₄ai řudjin te kerav te žianen la le manuš sar mai mišto kana dav duma.

₅Aven godiaver kudalensa kai si avri, ai keren mišto sako data kai šai daštin. ₆Ke tumari vorba t'avel sakda lasa o mištimos, thon pe late o guglimos, eta tume te keren te žianen sar te den palpale sakones.

₇O Tixiko, o mai drago phral ai o čačo ministero, muřo vortako kai služil le Bares, phenela tumenge sa so si nevo pa mande. ₈Me naročno tradav les karing tumende ke tume te žianen sar ame sam ai te miluil tumare ile. ₉Me tradav les le Onesimosa, o čačo ai mai šukar phral, kai si vi anda tumare. Von phenena tumenge sa sogodi nakhel kathe.

₁₀Aristarxo, muřo vortako phanglo mansa, del tume pozdraimos, ai vi o Marko, o vero katar o Barnabas, pa savo tume lian ordini — te žiala tumende, len sama lestar; ₁₁O Jesus, kai akharen les Justus, vi vo del tumen pozdraimos. Von si Židovuri, ai von ferdi kerde butji mansa pala e amperetsia le Devleski, ai ažutisarde man but.

₁₂O Epafras, kai si anda tumare, del tumen pozdraimos; sluga katar o Jesus Kristo, vo but marel pe pala tumende ande peske řudjimata, eta ke, vorta ai zurale, ninkerena tume ka sa so kamel o Del. ₁₃Ke me sim marturo ke vo kerel but pala tumende, kudalende anda o Laoditsea ai kudalende anda o Hierapolis. ₁₄O Lukas, o doxtoro but drago, del tume pozdraimos, ai vi o Demas. ₁₅Den pozdraimos le phralen kai si ande o Laoditsea, ai ka e Nimfa, ai ka e Khangeri kai si ande lako kher. ₁₆Kana kado lil avela gjindo tumendar, keren vi kadia ke t'avel vo gjindo ande e Khangeri ande o Laoditsea, ai ke tume te gjinen vi tume kudo kai avela anda o Laoditsea. ₁₇Ai phenen ka o Arxipos: Le sama katar e ministeria kai tu lian ande o Baro, eta te mišto te phires les.

₁₈Me dav tume pozdraimos, me o Paul, anda muřo vužio vast. Den tume godji ka muře phanglimata.

Ke o mištimos le Devlesko t'avel tumensa!