Efesian 6

₁Glati, patian o mui tumare niamongo, sar si o Baro, ke kadia si vorta. ₂De pativ tjire dades ai tjira da si e mai angluno poronka kai phenel so si t'avel mai angle, ₃eta ke tu t'aves veselo ai ke tu te trais but pe e phuv.

₄Ai tume, dada, na xoliaren tumare glaten, numa len sama lendar te lašiaren le ai te sikiaren le sar si o Baro.

₅Služi, patian ka tumare bare kathe pe phuv la darasa ai le izdraimasa, ande e prostia tumari ileski, sar o Kristo, ₆na ferdi angla lenge jakha, sar t'aven drago le manušenge, numa sar služi le Kristoske, kai keren laše ilesa so kamel o Del. ₇Služin le sa tumare ilesa, sar ke te služin le Bares ai na le manušen, ₈žianen ke sako, te si řobo, te si slobodo, lela katar o Baro sar vo kerela mištimos.

₉Ai tume, birevia, keren sa kadia karing lende, ai na daraven len, žianen ke vo kai si lengo birevo ai vi tumaro si ande o čeri, ai ke vo del kris sakoneske sar jekh fialo.

₁₀So mai si, zuriavon ande o Baro, ai katar leski bari zor, ₁₁Thon pe tumende sa le armi le Devleske, eta te ninkeren mišto pe le xitreni le bengeske. ₁₂Ke ame či maras ame pe le manuš, numa pa le amperatsi opral, pe le bare, pe le putiaria la lumiake kali, pe le duxuri nasul kai si ande o čeri. ₁₃Sa anda kudia, lel sa le armi le Devleske, eta te šai daštin te ninkeren ande le nasul dies, ai te ninkeren tume pe punřende pala ke kerdian sa.

₁₄Ninkeren zurales: t'avel tumen pe le prašave o čačimos sar prastia; Le le tsalia sastrune la krisake; ₁₅Thon papuči pe tumare punře o gribimos kai del e Laši Viasta la patiaki; ₁₆Ningeren angla tumende le fedevia le patiamaske, savensa tume šai mudaren sa le sulitsi pařake katar o Xitro; ₁₇len vi e stadi sastruni le skipimaski, ai e xanřo le Duxoski, kai si e vorba le Devleski. ₁₈Keren ande sa e vramia katar o Duxo sako fialo řudjimos ai mangimos. Len sama kudia sa zuralimasa, ai řudjin sa le narodoske le Devlesko ₁₉řudjin mange, eta ke t'avel mange, kana putrav o mui, te phenav zorasa te žianen e čudenia katar e Laši Viasta,

₂₀kaske me sim ambasadoro ande le lansuri, ai ke me dav duma zurales sar trubul te dav duma.

₂₁Eta ke vi tume, te žianen so si pe mande, so me kerav, o Tixiko, o mai drago phral ai o čačo ministero ande o Baro, phenela tumenge sa. ₂₂Tradav les tumenge naročno karing tumende, ke te žianen tume sar ame sam, ai te das mai but zor ande tumare ile.

₂₃Ke e patia ai e mila le patiamasa t'aven dine ka le phral katar e partia le Devleski ai katar o Rai o Jesus Kristo! ₂₄Ke o mištimos t'avel sa kudalensa kai si lenge drago amaro Baro o Kristo katar jekh kamimos kai či rimol pe.