Jono 10

₁Čačimasa, čačimasa, me phenav tumenge, kudo kai či del andre pa o vudar ande e stala le bakrengi, numa kai anklel pa e kaver rig, si jekh čor ai jekh řobaš. ₂Numa kudo kai del andre katar o vudar si kai arakhel le bakren. ₃O vudarari putrel leske, ai le bakroře ašunen lesko hango; vo akharel pa anaveste le bakrořen kai si leske, ai vo ningerel le avri. ₄Kana vo ankaladias avri sa peske bakrořen, vo phirel angla lende; ai le bakroře žian pala leste, ke von prinžiaren lesko hango. ₅Von či žian pala jekh streino; numa von našen dur lestar, ke von či prinžiaren o hango le streinosko.

₆O Jesus phenel lenge kadia paramiči, numa von či hatiaren pa soste vo del duma.

₇O Jesus mai phenel lenge: Čačimasa, čačimasa, me phenav tumenge, me sim o vudar le bakrořengo. ₈Sa kudala kai avile angla mande si čor ai řobaš; numa le bakroře či ašunde lende. ₉Me sim o vudar. Te si varekon ke te den andre mandar, vo avela skipime; vo dela andre ai anklela avri, ai vo arakhela so te xal. ₁₀O čor avel ferdi te čorel, te mudarel ai te phařavel; me avilem eta ke le bakroře t'avel le o traio, ai te bešen ande o but mištimos.

₁₁Me sim o lašio pastuřo. O lašio pastuřo del pesko traio pala peske bakroře. ₁₂Numa kudo kai si pokjindo, kai nai vo pastuřo ai kaske nai le bakroře, dikhel ke avel o ruv, mukel le bakrořen, ai lel pe ai našel; ai o ruv lel len ai phařavel len. ₁₃Kai si pokjindo našel, ke vo si pokjindo, ai ke leske nai mila anda le bakroře. ₁₄Me sim o lašio pastuřo. Me žianav muře bakrořen, ai von žianen man, ₁₅sar o Dad žianel ma ai sar me žianav le Dades; ai me dav muřo traio pala muře bakre. ₁₆Mai si ma kaver bakroře, kai nai ande kadia stala bakrengi; von ašunena muřo hango, ai avena sa ande jekh than ai jekh pastuřo.

₁₇O Dad kamel ma, ke me dav muřo traio, eta te lav les. ₁₈Khonik či lel les mandar, numa me dav les anda mande; si ma e putiaria te dav les, ai si ma e putiaria te lav les. Kadia si e ordina kai lem katar muřo Dad.

₁₉Mai sas pala kadala vorbi nevo hulaimos maškar le Židovuri. ₂₀But anda lende phenenas: Vo si les jekh demono, vo si dilo; sostar ašunen tume leste?

₂₁Kaver phenenas: Nai le vorbi katar jekh kai si bengalo; jekh demono šai putrel vo le jakha jekhe kořeske?

₂₂Vestisarde ande o Jerusalem o prasniko kai vužarde o templo. Sas o iven. ₂₃Ai o Jesus phiravelas pe ande o templo, tela le stilpuri katar o Salomon. ₂₄Le Židovuri ašiade krugom leste, ai phenen leske: Ži kana mukesa tu amen te na žianas? Te san tu o Kristo, phen les amenge čačimasa.

₂₅O Jesus del palpale: Me phendem tumenge, ai tume či patian tume. Le butia kai me kerav ande o anav muře Dadesko si martururi pa mande. ₂₆Tume či patian, ke tume či san anda muře bakroře. ₂₇Muře bakroře ašunen muřo hango; me prinžiarav le, ai von aven pala mande. ₂₈Me dav le o traio pe sakda; ai von či xasavona šoha, ai khonik či len len anda muřo vast. ₂₉Muřo Dad, kai dias le mange, si mai baro sar sa; ai khonik naštil te lel le anda o vast muře Dadesko. ₃₀Me ai o Dad sam jekh.

₃₁Atunči le Židovuri mai line bař te mudaren les. ₃₂O Jesus phenel lenge: Me sikadem tumenge but laše butia kai avile katar muřo Dad. Pala savo mudaren ma tume bařensa?

₃₃Le Židovuri den les palpale: Nai pala ke jekh laši butji ke ame mudaras tu bařensa, numa pala jekh prasaimos, ai si ke tu, kai san jekh manuš, tu keres tu Del.

₃₄O Jesus del len palpale: Nai ramome ande tumaro Zakono: Me phendem: Tume san dela? ₃₅Te akharela vo dela kudalen kaske e vorba le Devleski si phendi, ai t'avela ke o Ramomos naštil t'avel phařado, ₃₆kudo kai o Dad svintsisardias ai tradias les ande e lumia, tume phenen leske: Tu prasas! Ai kudia ke me phendem: Me sim o Šiav le Devlesko. ₃₇Te na kerava me le butia muře Dadeske, na patian mande. ₃₈Numa me te kerava, makar ke tume či patian mande, patian tume ka kudala butia, eta tume te žianen ai prinžiaren ke o Dad si ande mande ai ke me sim ande o Dad.

₃₉Pe kudia, von mai rodine te len les; numa vo skipisailo anda lenge vast.

₄₀O Jesus mai gelo inčial o Jordan, ande o than kai o Jono angla savořende bolelas. Ai vo bešel kothe. ₄₁But žene aven leste, ai von phenenas: O Jono či kerdias či jekh čudenia; numa so o Jono phendias pa kado manuš sas čačimos. ₄₂Ai, ande kudo than, but patian ande leste.