Jono 11

₁Sas jekh manuš nasvalo, Lazar, anda e Betania, gav katar e Maria ai e Marta, laki phei. ₂Sas kudia Maria kai svintsisardias duxasa le Bares ai kai khoslias leske punře peske balensa, ai sas lako phral o Lazar kai sas nasvalo. ₃Le pheia tradine te phenen ka o Jesus: Baria, eta, kudo kai tu kames si nasvalo.

₄Pala ke ašundias kudia, o Jesus phenel: Kudo nasvalimos nai merimasko; numa si te vestin le Devles, eta ke o Šiav le Devlesko t'avel vestime lestar.

₅Eta, o Jesus sas leske drago e Marta, ai laki phei, ai o Lazar. ₆Sar vo ašundias ke o Lazar sas nasvalo, vo mai bešlo dui dies ande o than kai vo sas, ₇ai vo phenel atunči ka le vortača: Avas palpale ande e Judea.

₈Le vortača phenen leske: Rabi, le Židovuri nai de dumult rodenas te mudaren tu le bařensa ai tu žias palpale ande e Judea!

₉O Jesus del palpale: Nai deš-u-dui časuri ande o dies? Te si varekon ke phirel diese, vo či isdral, ke vo dikhel e vedaria kadala lumiaki. ₁₀Numa, te si varekon ke phirel riate, vo isdral, ke e vedaria nai ande leste. ₁₁Pala kadala vorbi, vo phenel lenge: Lazar, amaro vortako, sovel; numa žiav te uštiavav les.

₁₂Le vortača phenen leske: Baria, te sovel vo, vo sastiol.

₁₃O Jesus diasas duma pa lesko merimos, numa von gindinas ke vo dias duma pa leski lindri. ₁₄Atunči o Jesus phenel lenge vorta: O Lazar mulo. ₁₅Ai, pala tumende, eta ke tume te patian, me veseli ma ke me či simas kothe. Ame žias karing leste.

₁₆Pe kudia o Tomas, akhardo Žiameno, phenel le kavre vortakonge: Žias vi ame, te meras lesa.

₁₇O Jesus, vo areslo, arakhlias ke o Lazar sas inke de štar dies ande o groapoševo. ₁₈Ai, sar e Betania si paše paša o Jerusalem, pašte trin kilometri, ₁₉but Židovuri avilesas karing e Maria ai e Marta, te vatin le ke mulo lengo phral.

₂₀Kana e Marta ašundias ke o Jesus areslo, voi geli angla leste, žikin e Maria bešelas tele ande o kher. ₂₁E Marta phenel ka o Jesus: Baria, te avilianas tu kathe, muřo phral sas te na merel. ₂₂Numa, inke akana, me žianav ke sogodi tu manges ka o Del, o Del del les tuke.

₂₃O Jesus phenel lake: Tjiro phral živindila.

₂₄Me žianav, del palpale e Marta, ke vo živindila kana avela o živindimos, o mai paluno dies.

₂₅O Jesus phenel lake: Me sim o živindimos ai o traio. Kudo kai patial ande mande traila, makar t'avela mulo; ₂₆ai kon-godi trail ai patial ande mande či merela šoha. Patias tu kudia?

₂₇Voi phenel leske: Ei, Baria, me patiav ma ke tu san o Kristo, o Šiav le Devlesko, kai trubulas t'avel ande e lumia.

₂₈Dias duma kadia e Marta ai vi voi gelitar. Porme akharel pe čoral la Maria, peski phei, ai phenel lake: O Birevo lo kathe, ai mangel tu. ₂₉Sar e Maria ašundias, voi uštili sigo, ai geli karing leste. ₃₀Ke o Jesus inke či dias andre ande o gav, numa sas ande o than kai e Marta arakhlias les. ₃₁Le Židovuri kai sas la Mariasa ande o kher ai kai vatinas la, dikhle ke voi uštili sigo ai anklisti avri, gele pala late, phenenas: Voi žial ka o groapoševo, te rovel.

₃₂Kana e Maria aresli kothe kai si o Jesus, voi peli ka leske punře, ai phenel leske: Baria, t'avilianas tu kathe, muřo phral sas te na avel mulo.

₃₃O Jesus dikhlias ke rovel, voi ai le Židovuri kai sas lasa, isdrailo ande peste, ai sa lias les e mila. ₃₄Ai vo phenel: Kai thodian les tume?

Baria, den les von palpale, aidi ai dikh.

₃₅O Jesus rovel. ₃₆Pe kudia le Židovuri phenen: Dikhen sar kamelas les.

₃₇Ai uni maškar lende phenen: Vo kai puterdias le jakha le kořeske naštisardiasas te kerel vo ke kado manuš te na merel?

₃₈O Jesus mai isdraias ande peste, gelo ka o groapoševo. Sas jekh groapa, ai jekh bař sas thodino anglal. ₃₉O Jesus phenel: Len o bař.

E Marta, e phei le muleski, phenel leske: Baria, vo khandel inke, ke de štar dies vo si kothe.

₄₀O Jesus phenel lake: Či phendem tuke me, te patiasa, tu dikhesa o vestimos le Devlesko? ₄₁Von line tele kadia o bař. Ai o Jesus vazdias le jakha opre, ai phenel: Tate, me naisiv tuke de sar tu ašundian mande. ₄₂Mange, me žianav ke tu sakda ašunes mande; numa me dem duma pala o narodo kai si krugom mandar, eta te patian ke tu san kai tradian man. ₄₃Phendias kudia, vo tsipisardias jekh hango zuralo: Lazar, ankli! ₄₄Ai o mulo anklisto, le punře ai le vast phangle ande selii, ai lesko mui garado ande jekh pištjiri. O Jesus phenel: Putren les, ai muken les te žial.

₄₅But anda le Židovuri kai avile karing e Maria, ai kai dikhle so kerdias o Jesus, patian ande leste. ₄₆Numa uni anda lende gele t'arakhen le Farizianon, ai phende lenge so o Jesus kerdias. ₄₇Atunči le bare raša ai le Farizianuri kjidine e Kris e židovitsko, ai phenen: So kerasa ame? Ke kado manuš kerel but čudeni. ₄₈Te mukasa ame te kerel, sa patian ande leste, ai le Romanuri aven te phařaven amaro foro ai amaro them.

₄₉Jekh anda lende, Kaifas, kai sas o baro rašai kudo berš, phenel lenge: Tume či hatiaren khanči; ₅₀tume či den tume godji ke tumenge avela mai mišto ke ferdi jekh manuš merel le narodoske, ai ke sa o them te na xasavol. ₅₁Eta, či phenelas kudia vo anda peste; numa ke sas baro rašai kudo berš, vo sikiardias mai anglal ke o Jesus trubul te merel pala o them. ₅₂Ai nai ke ferdi pala o them; sas kadia eta te kjiden ande jekh stato le šiave le Devleske řipime.

₅₃De katar kudo dies, von thode pe te mudaren les. ₅₄Sa anda kudia o Jesus či mai sikadiol maškar le Židovuri; numa vo gelotar ande le riga paša e pusta, ande jekh foro kai bušol Efraim; ai kothe bešel peske vortakonsa.

₅₅E Patradi le Židovongi pašiol. Ai but žene anda o them anklen ande o Jerusalem angla e Patradi, te vužion. ₅₆Von roden le Jesus, ai von phenen jekh avreske ande o templo: So miazol tumenge? Či avela vo pe o prasniko? ₅₇Eta, le bare raša ai le Farizianuri dinesas e ordina ke, te si varekon te žianel kai lo vo, te phenel les, eta te len les.