Jono 13

₁Angla o prasniko la Patradiako, o Jesus žianelas ke lesko časo avilo te nakhel katar e lumia ka o Dad, ai sas leske drago peske kai sas ande e lumia, dias sa pesko kamimos lenge.

₂Žikin xan, o beng dias ande o Juda Iskariot, šiav katar o Simon, sikiardias les te bikjinel les. ₃O Jesus, kai žianelas ke o Dad thodias sa le dieli ande leske vast, ai ke vo avilo katar o Del ai žialtar ka o Del, ₄uštilo katar e skafidi, lias le tsalia pa peste, ai lias jekh pištjiri, phanglias les pe lesa. ₅Atunči dias muial pai ande jekh balai, ai lias pe te xalavel le punře peske vortakonge, ai khosel len le pištjiresa kai sas lesa phanglo. ₆Vo avilo kadia ka o Simon Petri; ai o Petri phenel leske: Tu, Baria, tu xalavesa muře punře!

₇O Jesus del les palpale: So me kerav, tu či hatiaresa akana, numa tu hatiaresa sigo.

₈O Petri phenel leske: Niči šoha tu či xalavesa muře punře.

O Jesus del les palpale: Te na me xalavava tut, tut či avela partia mansa ande e amperetsia le Devleski.

₉O Simon Petri phenel leske: Baria, na ferdi le punře, numa vi le vast ai vi o šero.

₁₀O Jesus phenel leske: Kudo kai si xalado trubul les ferdi te xalavel peske punře t'avel sa vužio; ai tume san vuže, numa na sa. ₁₁Ke vo žianelas kudales kai si te del les ande o vast; sa anda kudia vo phendias: Tume či san sa vuže.

₁₂Pala ke xaladias lenge punře, ai ke lias peske tsalia pe peste vo thodias pe pala e skafidi, ai phenel lenge: Hatiaren tume so me kerdem tumenge? ₁₃Tume akharen ma Birevo ai Baro; ai tume phenen mišto, me sim. ₁₄Te si ke me xaladem le punře, me, o Baro ai o Birevo, tume trubul te xalaven tumare punře jekh avreske. ₁₅Ke me dem tumen jekh semno te sikavav, eta ke tume te keren sar me kerdem. ₁₆Čačimasa, čačimasa, me phenav tumenge, e sluga nai voi mai bari sar lako birevo, či o apostolo sar kudo kai tradias les. ₁₇Te žianena tume kadala dieli, tume san vesele, te kerena tume kadia.

₁₈Na ke anda sa tumende ke me dav duma; ke me žianav kudalen kai me alosardem. Numa trubul ke o Ramomos te aresel:

₁₉De akanara me phenav tumenge, angla savořende ke te e diela aresel, eta ke kana aresela, tume patiana so me phendem. ₂₀Čačimasa, čačimasa, me phenav tumenge, kudo kai primila kudales kai me tradem primila man, ai kudo kai primil ma primil kudales kai tradias man.

₂₁Dias duma kadia, o Jesus nas leske mišto ande lesko duxo, ai vo phenel naročno: Čačimasa, čačimasa, me phenav tumenge, jekh anda tumende bikjinel ma.

₂₂La vortača dikhen jekh pe avreste, či žianenas pa kaste del duma. ₂₃Jekh anda leske vortača, kudo kai o Jesus kamelas, bešel paša le Jesus. ₂₄O Simon Petri kerel leske semno te pušel kon si kudo kai o Jesus del duma pa leste.

₂₅Ai kudo vortako, bangilo pe o kolin le Jesusosko, phenel leske: Baria, kon si?

₂₆O Jesus del les palpale: Kudo si kaske me dava o kotor o kjingo. Ai, kjingiardias pesko kotor, vo dias les ka o Juda, šiav katar o Simon, o Iskariot. ₂₇De sar o kotor sas dino, o Satan dias ande o Juda. O Jesus phenel leske: So tut si te keres, ker les sigo. ₂₈Numa či jekh anda kudala kai sas ka e skafidi či hatiarde sostar vo phendias leske kudia; ₂₉ke uni gindinas ke, sar o Juda sas les e tišila, o Jesus kamelas te phenel leske: Kjin so trubul ame pe o prasniko, vai ke porončilas leske te del vareso le čořen.

₃₀O Juda, lias o kotor, gribisailo t'anklel avri. Sas e riat.

₃₁Kana o Juda anklisto avri, o Jesus phenel: Akana, o Šiav le manušesko sas vestime, ai o Del sas vestime ande leste. ₃₂T'avel ke o Del sas vestime ande leste, o Del vi vo vestila les ande peste, ai mai vestila les. ₃₃Muře tsinoře glati, me mai sim pe tsiřa vramia tumensa. Tume rodena ma; ai, sar me phendem le Židovonge: Tume naština t'aven kothe kai me žiav, me phenav les vi tumenge akana. ₃₄Me dav tumen jekh poronka nevi: T'aven drago jekh avreske; sar me kamlem tumen, vi tume, kamen tume jekh avres. ₃₅Ande kudia sa žianena ke tume san muře vortača, te si tume kamimos jekh avreske.

₃₆O Simon Petri phenel leske: Baria, kai žiasa tu?

O Jesus del les palpale: Tu naštis akana t'aves pala mande, numa tu avesa mai palal.

₃₇Baria, phenel leske o Petri, sostar naštiv te žiav me pala tute akana? Me dava muřo traio pala tute.

₃₈O Jesus del palpale: Tu desa tjiro traio pala mande! Čačimasa, čačimasa, me phenav tuke, o kokošo či gjilabela tri-var ke tu či mai prinžiaresa ma.