Jono 2

₁Trin dies pala kudia, sas abiav ande e Kana ande e Galilea. E dei le Jesusoski sas kothe. ₂Ai o Jesus vi vo sas akhardo ka o abiav peske vortakonsa. ₃E mol mai trubul, e dei le Jesusoski phenel leske: Manai len mol.

₄O Jesus del la palpale: Žiuvlio, so si maškar tute ai maškar mande? Muřo časo inke či avilo.

₅Leski dei phenel le slugenge: Keren so phenela tumenge.

₆Eta, sas kothe šov kanti bařenge, thodine te xalaven pe le Židovuri ai šai žial andre dui vai trin mezuri. ₇O Jesus phenel: Pheren pai kadala kanti, ai von pherdine le ži ka o mui. ₈Len andral akana, phenel lenge vo, ai ningeren le ka kudo, kai lašiarel o abiav. Ai ningerde. ₉Kana kudo kai lašiarel o abiav zumadias o pai pařudo mol — či žianelas katar avel kudia mol, žikin le služi kai line o pai žianenas mišto, — vo akharel le řomes, ₁₀ai phenel leske: Sako manuš del angla savořende e laši mol, porme e mai prosto pala ke mation; tu, tu garadian e laši mol ži akana.

₁₁Kadia sas, ande e Kana ande e Galilea, e mai angluni čudenia kai kerdias o Jesus. Vo sikadias pesko vestimos, ai leske vortača patianas ande leste.

₁₂Pala kudia, vo vulisto ande o Kapernaum, peska dasa, peske phralensa ai peske vortakonsa, ai von bešle ferdi tsiřa dies.

₁₃E Patradi le Židovongi pašiol, ai o Jesus anklel ande o Jerusalem. ₁₄Vo arakhlias ande o templo kudalen kai bikjinen le guruven, le bakrořen ai le gulumbon, ai vi kudalen kai pařuven. ₁₅Kerdias jekh bičo le šelensa, vo gonisardias le sa anda o templo, vi le bakrořen ai vi le guruven; vo peradias le xurde love kudalenge kai pařuvenas, ai dias muial le skafidia; ₁₆ai vo phenel kudalenge kai bikjinen le gulumbon: Len kadala kathar, na keren anda o kher muře Dadesko jekh kher bikjinimasko. ₁₇Leske vortača dine pe gindo ke sas ramome:

₁₈Le Židovuri line e vorba, phenen leske: Če čudenia sikaves tu amenge, te keres kadia?

₁₉O Jesus del palpale: Phařaven kado templo, ai ande trin dies me vazdava les.

₂₀Le Židovuri phenen: Trubusardias štar-var-deš ai šov berš te vazden kado templo, ai tu, ande trin dies tu vazdesa les!

₂₁Numa vo delas duma pa o templo peske statosko. ₂₂Sa anda kudia, kana vo živindisailo anda le mule, leske vortača dinesas pe godji so vo phendias, ai von patian ka o Ramomos ai ka e vorba kai o Jesus phendias.

₂₃Žikin o Jesus sas ande o Jerusalem, ka o prasniko e Patradi, but patianas ande lesko anav, dikhenas le čudeni kai vo kerdias. ₂₄Numa o Jesus či ninkerel pe lende, ke vo žianelas len sa, ₂₅ai leske či trubulas t'avel les martururi či jekh anda le manuš ke vo inke žianelas so si ande o manuš.