Jono 3

₁Numa sas jekh manuš maškar le Farizianuri, bušolas Nikodem, jekh birevo le Židovongo, ₂kai avilo, vo, paša o Jesus, riate, ai phenel leske: Rabi, ame žianas ke tu san jekh zakonari kai avilo katar o Del; ke khonik naštil te kerel le čudeni kai tu keres, te na avilo o Del lesa.

₃O Jesus del les palpale: Čačimasa, čačimasa, me phenav tuke, te na jekh manuš mai arakhadiola nevo, naštil te dikhel e amperetsia le Devleski.

₄O Nikodem phenel leske: Sar jekh manuš šai mai arakhadiol kana si phuro? Šai mai del vo ande o peř peska dako ai arakhadiol?

₅O Jesus del palpale: Čačimasa, čačimasa, me phenav tuke, te na jekh manuš arakhadiola anda o pai ai o Duxo, naštil te del andre ande e amperetsia le Devleski. ₆So arakhadilo anda o mas si mas, so arakhadilo anda o Duxo si duxo. ₇Te na avel tuke šodo ke me phendem: Trubul te mai arakhadios nevo. ₈E balval phurdel kai voi kamel, ai tu ašunes sar bašel; numa tu či žianes katar avel, či kai voi žial. Sa kadia si anda o manuš kai arakhadilo anda o Duxo.

₉O Nikodem phenel leske: Sar šai t'avel kadia?

₁₀O Jesus del les palpale: Tu san o zakonari ande o Israel, ai tu či žianes kadala dieli! ₁₁Čačimasa, čačimasa, me phenav tuke, ame phenas so ame žianas, ai ame sam martururi anda so dikhliam; ai tume či len amari marturia. ₁₂Te na patiana tume kana me dem duma pa le dieli la phuviake, sar patiana tume kana dava duma pa le dieli le čereske? ₁₃Khonik či anklisto ande o čeri, te na avela kudo kai vulisto anda o čeri, o Šiav le manušesko kai si ande o čeri.

₁₄Ai sar o Moše vazdias le sapes ande e pusta, sa kadia trubul ke o Šiav le manušesko t'avel vazdino. ₁₅Eta ke sako kai patial ande leste t'avel les o traio pe sakda. ₁₆Ke o Del kadia kamlias la lumia ke dias peske ferdi jekhe Šiaves, eta ke kongodi patial ande leste te na xasavol, numa t'avel les o traio pe sakda. ₁₇O Del, čačes, či tradias peske Šiaves ande e lumia te del kris la lumia, numa ke e lumia t'avel skipime lestar.

₁₈Kudo kai patial ande leste nai dino pe kris; numa kudo kai či patial si vuže dino kris, ke vo či patial ande o anav le jekhe Šiavesko le Devlesko. ₁₉Ai kadia kris si ke, e vedaria avili ande e lumia, le manuš mai drago sas lenge o tuniariko sar e vedaria, ke lenge butia nas laše. ₂₀Ke kon-godi kerel o nasulimos vuřitsil e vedaria, ai či avel ka e vedaria, daratar ke sikavel so vo kerdias. ₂₁Kudo kai kerel o čačimos avel ka e vedaria, eta ke sikavel ke leske dieli si kerde katar o Del.

₂₂Pala kudia, o Jesus sas peske vortačensa, gelo ande e phuv e Judea; ai kothe bešlo lensa, ai bolelas. ₂₃Vi o Jono bolelas ande o Enon, paša o Salim, ke kothe sas but pai; ai avenas te bolen pe. ₂₄Ke o Jono nas inke thodino ande e temnitsa.

₂₅Eta, vazdias pes maškar le Jonoske vortača ai jekh Židovo jekh čingar, sar vužarenas pe. ₂₆Von avile t'arakhen le Jono, ai phenen leske: Rabi, kudo kai sas tusa inčial o Jordan, ai kaske tu sanas marturo, eta, vo bolel, ai sa žian leste.

₂₇O Jono del palpale: Jekh manuš naštil te lel mai but ke ferdi so si les dino anda o čeri. ₂₈Tume san muře martururi ke me phendem: Me či sim o Kristo, numa me sim tradino angla leste. ₂₉Kudo kaski si e řomni, si o řom; numa o vortako le řomesko, kai bešel kothe ai kai ašunel, si les jekh bari veselia katar o hango le řomesko. Kadia kudi veselia, kai si muři, si vorta. ₃₀Vo trubul te bariol, ai me ke te teliuvav.

₃₁Kudo kai avel de opral si opral pa sa; kudo kai si katar e phuv si phuviako, ai vo del duma sar si la phuviako. Kudo kai avel anda o čeri si opral pa sa, ₃₂vo si marturo de so vo dikhlias ai ašundias, ai khonik či lel so phenel. ₃₃Kudo kai ašundias so vo phendias šai phenel ke o Del si čačo; ₃₄ke kudia, kai o Del tradias phenel le vorbi le Devleske, ke o Del či del o Duxo mezurasa. ₃₅O Dad drago leske o Šiav, ai vo thodias sa le dieli ande leske vast. ₃₆Kudo kai patial ande o Šiav si les o traio pe sakda; kudo kai či patial ande o Šiav či dikhela o traio, numa e xoli le Devleski bešel pe leste.