Lukas 12

₁Pe kudia, le žene kjide pe miensa kadia t'ičaren pe jekh avres, o Jesus lias pe te phenel peske vortakonge:

Angla savořende, len tume sama katar e drosda le Farizianongi, ke si o xoxaimos. ₂Nai khanči garado kai te na anklel avri, či garado te na avel prinžiardo. ₃Sa anda kudia sogodi tume phenena ande o tuniariko avela ašundo ande e vedaria, ai so tume phenena ka o kan ande le sobi avela phendo pe le čardakuri.

₄Me phenav tumenge, tumenge kai san muře vortača: Na daran katar kudala kai mudaren o stato ai kai, pala kudia, naštin te keren mai khanči. ₅Me sikavava tumenge kastar tume trubul te daran. Daran katar kudo kai, kana mudarela, si les e putiaria te šiudel ande e pařa; ei, me phenav tumenge, katar kudo tume trubul te daran.

₆Či bikjinen panž čirikliořa pe dui šuvia? Numa, či jekh anda lende nai busterdo angla o Del. ₇Ai jekh fialo le bal pa tumaro šero si gjinde. Te na daran; tume san mai kuč sar but čirikliořa.

₈Me phenav tumenge. Kon-godi phenela pa mande angla le manuš, o Šiav le manušesko vo phenela pa leste angla le andželi le Devleske; ₉numa kudo kai dela ma palpale angla le manuš avela dino rigate angla le andželi le Devleske.

₁₀Ai kon-godi phenela pa o Šiav le manušesko, avela leske jertime; numa kudo kai prasal pe o Svinto Duxo, či avela leske šoha jertime.

₁₁Kana ningerena tumen angla le khangeria židovitsko, angla le krisinitoria ai le rai bare, na len sama sar tume čačiona vai so tume phenena, ₁₂ke o Svinto Duxo sikiarela tumen ka kudo časo so trubul tume te phenen.

₁₃Varekon phenel le Jesusoske, maškar o narodo:

Birevo, phen muře phraleske te hulavel mansa so muklias amaro dad.

₁₄O Jesus del les palpale:

O, manuš, kon thodias ma t'avav tumaro krisinitori, vai te hulavav tumenge?

₁₅Porme phenel lenge:

Len tuma sama mišto katar sa o xanžvalimos; ke o traio jekhe manušesko avel nai ferdi anda leske mandjinata, makar t'avela les but.

₁₆Ai vo phenel lenge kadia paramiči:

Le phuvia jekhe manušeske barvale dine les pria but. ₁₇Ai vo gindil pe ande peste, phenelas: So kerava me? ke nai ma than kai te thav o kjidimos. ₁₈Eta, phenel vo, so me kerava: Me peravava muře stali, me vazdava mai bare, me thova kothe sa so kjidem ai sa muře mištimata; ₁₉ai me phenava muře duxoske: Muřo duxo, si tu but mištimata thodine rigate pe but berš; hodinisar, xa, pi, ai veselisavo. ₂₀Numa o Del phenel leske: Dilia! kadia riat inke tjiro duxo avela lino; ai so tu lašiardian, kaske avela?

₂₁Kadia si kudaleske kai kjidel mandjinata peske, ai kai nai barvalo le Devleske.

₂₂O Jesus phenel atunči peske vortakonge:

Sa anda kudia me phenav tumenge: Na daran pala tumaro traio de so tume xana, či pala tumaro stato sar avela uriado. ₂₃O traio si mai but sar o xamos, ai o stato mai but sar le tsalia. ₂₄Len sama sar si le kurunga: Von či bariaren ai či kjiden, len nai le či kherořo či stala; ai o Del pravarel le. Sar či san tume mai kuč le čirikliandar! ₂₅Kon anda tumende, te nekežil pe, šai lunžiarel pesko traio? ₂₆Te si kadia ke tume naštin te keren e mai tsinoři diela, sostar gindin tume anda so mai si? ₂₇Len sama sar barion le luludia: Von či keren butji ai či khuven; numa me phenav tumenge ke inke o Salomon, ande sa pesko vestimos, nas uriado sar jekh anda lende. ₂₈T'avela ke o Del uriavel kadia e čar kai si adies ande le kimpuri ai ke tehara avela šiudini ande o bov, sar te na mai but či uriavela tumen vo, žene kai tsiřa patian? ₂₉Ai tume, na roden so xana ai so pena, ai na daran. ₃₀Ke sa kudala dieli, si kudala thema kai či patian kai roden le. Tumaro Dad žianel so trubul tumen. ₃₁Roden mai sigo e amperetsia le Devleski; ai sa kudala dieli avena tumenge dine opral.

₃₂Na daran, tsinoři trupa; ke tumaro Dad kamel te del tumen e amperetsia. ₃₃Bikjinen so si tumen, ai den ka le čoře. Keren tumenge tišili kai či rimon pe, jekh mandjin kai či bilal ande o čeri, kai le čor či pašion, ai kai o kermo či phařavel. ₃₄Ke kothe kai si tumaro mandjin, vi kothe si tumaro ilo.

₃₅Ke tumare prasti t'aven phangle, ai tumare lampasa dine jag. ₃₆Ai tume, aven jekh fialo sar le manuš kai ažiukeren ke lengo birevo avel pa o abiav, eta te putren leske sar vo aresela ai malavela ande o vudar. ₃₇Veseli kudala služi kai o birevo, kana aresela, arakhela ke len sama! Me phenav tumenge čačimasa, vo phandela opre pesko tsolo, thola le pala peski skafidi, ai pašiola te služil le. ₃₈Te avela vo maškar e riat, veseli kudala služi, te arakhela len ke len sama! ₃₉Te žianen mišto, te si o birevo le kheresko te žianela ka če časo o čor si t'avel, vo lela sama ai či mukela te phařavel lesko kher. ₄₀Vi tume, arakhen tume, ke o Šiav le manušesko avela ka o časo kai tume či gindina.

₄₁O Petri phenel leske:

Baria, si amenge, vai savořenge, ke tu phenes kadia paramiči? ₄₂Ai o Baro phenel:

Savo si o manuš čačo kai lesko birevo dela leske te lel sama pa pesko kher ai kai o birevo thola les baro pe peske žene, te del len te xan ande e vramia kai trubul? ₄₃Veselo kudia sluga, kai lesko birevo, kana aresel, arakhel les ke kerel kadia! ₄₄Me phenav tumenge čačimasa, vo thola les baro pe sa leske mištimata. ₄₅Numa, te si kudia sluga te phenel ande peste: Muřo birevo či avel sigo, vo lias pe te marel le slugen ai le sluganken, te xal, te pel ai te matiol. ₄₆O birevo kudala slugako avela o dies kai vo či ažiukerel les ai o časo kai vo či žianel, vo šinela les kotora, ai dela les leski partia kudalensa kai nai čače.

₄₇E sluga kai, žianelas so kamel lesko birevo, či lašiardias khanči ai či kerdias sar vo kamlias, avela mardo butivar. ₄₈Numa kudo kai, či žianglias, kerdias kudala dieli pala save trubul t'avel mardo, avela mardo tsiřa. Mangena but katar kudala kaske dine but, ai mangena mai but katar kudo kaske dine mai but.

₄₉Me avilem te šiudav jekh jag pe e phuv, ai sode kamlemas me, te avel vuže dino jag! ₅₀Si jekh bolimos kai trubul te bolen ma ande leste, ai sode ažiukerav t'avel kudia! ₅₁Gindin tume ke me avilem t'anav e patia pe e phuv? Niči, phenav tumenge me, numa te hulavav. ₅₂Ke d'akanara panž ande jekh kher avena hulade, trin pe dui, ai dui pe trin; ₅₃o dad pe o šiav ai o šiav pe o dad, e dei pe e šei ai e šei pe e dei, e sakra pe e bori ai e bori pe e sakra.

₅₄Vo mai phenel le narodoske:

Kana tume dikhen jekh nuvero ke uštel karing o stingo, tume phenen strazo: O brišin avel. Ai vi avel kadia. ₅₅Ai kana tume dikhen ke phurdel e balval katar e rig tele, tume phenen: Avela tato, ai kudia aresel. ₅₆Athaitori! Tume žianen sar si e phuv ai o čeri; sar či den tume pe o gor kadia vramia?

₅₇Ai sostar či den tume pe o gor anda tumende so si vorta? ₅₈Kana tu žias tumare dušmanosa angla o krisinitori, zumav pe e vurma te šiudes tu lestar, daratar ke ningerela tu angla o krisinitori, ke o krisinitori dela tu ande o vast ka o fitsiri la krisako, ai ke kudo thola tu ande e temnitsa. ₅₉Me phenav tuke, tu či anklesa avri kothar žikin či pokjinesa ži ka o mai paluno šuv.