Lukas 13

₁Sa ande kudia vramia, uni manuš kai sas kothe phenen le Jesusoske so areslias le manušen ande e Galilea kai o Pilato mudardias ande e vramia kai von dine sakrifiso. ₂Vo del len palpale:

Gindin tume ke kudala Galileanuri sas von mai bare bezexale de sar le kaver Galileanuri, ke von kjinuisaile kadia? ₃Niči, me phenav tumenge; numa tume te na keina tume, vi tume xasavona. ₄Vai mišto, kudala deš-oxto žene pe kaste pelo o turo ande o Siloe ai mudardias len, gindin tume ke von sas mai but došale sar sa kudala kai bešen ande o Jerusalem? ₅Niči, me phenav tumenge. Numa tume te na keina tume, vi tume xasavona.

₆Vo mai phenel kadia paramiči:

Jekh manuš sas les jekh kopači figengo ande peski rez. Vo avilo te rodel fruti, ai vo či arakhlias. ₇Atunči phenel kudaleske kai kjidel e rez: Eta trin berš ke me avav te rodav fruta ka kado kopači, ai me či arakhav. Šinen les! Sostar lel vo jekh than intaino? ₈Kudo kai kjidel e rez phenel leske: Baria, mai muk les kado berš, hunavava krugom lestar, ai thava gosni. ₉Amburim mai angle dela vo fruta, te niči, tu šinesa les.

₁₀O Jesus sikiarelas ande jekh khangeri židovitsko, o dies o sabato. ₁₁Ai eta, sas kothe jekh žiuvli kai sas ande late jekh duxo kai bangiarelas la de deš-oxto berš; voi sas bangi, ai naštilas či jekh fialo te bešel vorta. ₁₂Kana vo dikhlias la, o Jesus del duma lasa, ai phenel lake:

Žiuvlio, tu san skipime anda tjiro bangimos.

₁₃Ai vo thodias pe late le vast. Strazo voi bešli vorta, ai naisil le Devles. ₁₄Numa o birevo katar e khangeri židovitsko, xoliariko ke o Jesus kerdias kudia diela te sastiol jekh dies o sabato, phenel le narodoske:

Si šov dies te keren butji; aven te sastion kudala dies, ai na o dies le sabatosko.

₁₅Athaitori! del les palpale o Baro, nai sako anda tumende, o dies o sabato, či putrel ande peski stala peske guruves vai peske magares, te ningerel les te pel? ₁₆Ai kadia žiuvli, kai si jekh šei katar o Abraham ai ke o Satan ninkerelas la phangli de deš-oxto berš, či trubulas te skipin la katar kudo lanso o dies o sabato?

₁₇Sar vo delas duma kadia, sa leske dušmaia sas pe lažiav mišto, ai o narodo veselilas pe anda sa le dieli veseli kai vo kerelas.

₁₈Vo mai phenel:

Sar si e amperetsia le Devleski, pe kaste te phenav la me? ₁₉Si jekh fialo sar jekh simintsa garčitsaki kai jekh manuš lias ai šiudias la ande pesko kimpo; voi barili, areslo kopači, ai le čiriklia anda o čeri bešen ande lake patria.

₂₀Vo mai phenel:

Sar te sikav tumenge me e amperetsia le Devleski? ₂₁Si jekh fialo sar e drosda kai jekh žiuvli lias ai thodias ande trin mezuri ařo, t'uštel sa o ařo.

₂₂O Jesus nakhelas le foruri ai le gava, sikiarelas, ai žialas pe o drom karing o Jerusalem. ₂₃Varekon phenel leske:

Baria, si ferdi tsiřa žene kai si skipime?

Vo del len palpale:

₂₄Thon zor te den andre pa o vudar tang. Ke, me phenav tumenge, but roden te den andre, ai naština. ₂₅Kana o birevo le kheresko uštela ai phandavela o vudar, ai ke tume san avri, tume lena tume te malaven ande o vudar, phenena: Baria, Baria, puter amenge! Vo dela tumenge palpale: Me či žianav katar san tume. ₂₆Atunči tume thon tume te phenen: Ame xaliam ai piliam tusa, ai tu sikiardian ande amare vulitsi. ₂₇Ai vo dela palpale: Me phenav tumenge, me či žianav katar tume san; žiantar mandar, tume sa, butiaria bezexale. ₂₈Kothe avela roimata ai grintsina le dand, kana tume dikhena le Abraham, le Isak ai le Jakob, ai sa le profeton, ande e amperetsia le Devleski, ai ke tume avena šiudine avri. ₂₉Avena anda e rig e čači ai anda e rig e stingo, opral ai telal; ai von thona pe pala e skafidi ande e amperetsia le Devleski. ₃₀Ai eta, avela anda le mai palune kai avena le mai anglune, ai anda le mai anglune kai avena le mai palune.

₃₁Sa kudo dies, uni Farizianuri aven te phenen leske:

Žiatar, žia katar, ke o Herodo kamel te mudarel tu.

₃₂Vo del le palpale:

Žian ai phenen ka kudia lisitsa: Eta, me goniv le demonon ai me sastiarav adies ai tehara, ai o trito dies getova. ₃₃Numa trubul me te phirav adies, tehara, ai o dies pala kudo, ke či avela mišto ke jekh profeto te avel mudardo avrial pa o Jerusalem.

₃₄Jerusalem, Jerusalem, kai mudares le profeton ai kai mudares bařensa kudalen kai si tute tradine, sodivar me kamlem te kjidav tjire glaten, sar jekh khaini kjidel peske puien tela peske phaka, ai tume či kamlian. ₃₅Eta, tumaro kher avela tumenge muklo; numa, me phenav tumenge, tume či mai dikhena ma, žikin či tume phenena: Svintsime t'avel kudo kai avel ande o anav le Baresko!