Matei 15

₁Atunči le Farizianuri ai le zakonaria avile anda o Jerusalem paša o Jesus, ai phenen: ₂Sostar tjire vortača šinen von so kerenas le phure? Ke von či xalaven penge vast, kana von žian te xan.

₃Vo del le palpale: Ai tume, sostar šinen tume le poronki le Devleske te keren sar si tumaro zakono? ₄Ke o Del phendias: De pativ tjire dades ai tjiria da; ai, kudo kai dela armaia peske dades vai peska da avela dino strafo te merel. ₅Numa tume, tume phenen: Kudo kai phenel peske dadeske vai peska dake: E partia muře mištimaski kai me šai dav tumen si thodini rigate le Devleske, ₆či mai trubul t'ažutil peske dades vai peska da. Tume kadia len tele e vorba le Devleski te keren sar si tumaro zakono. ₇Athaitoria, o Esai mišto phendias pe tumende, kana vo phendias:

₁₀Akhardias vo peste o narodo, vo phenel leske: Ašunen, ai hatiaren. ₁₁Nai so den ande o mui ke mahril le manušes; numa sogodi anklel anda lesko mui, kudo mahril le manušes.

₁₂Atunči leske vortača pašile paša leste, ai phenen leske: Žianes tu ke le Farizianuri xoliaile katar le vorbi kai von ašunde?

₁₃Vo del palpale: Sako kopači kai či thodias te bariol muřo dad avela ankaladi avri. ₁₄Muken le; von si koře kai ningeren kavre kořen, t'avela ke jekh kořo ningerel jekhe kavre kořes, von perena vi le dui ande jekh groapa.

₁₅O Petri, lias e vorba, phenel leske: Phen amenge so si kudia paramiči.

₁₆Ai o Jesus phenel: Vi tume, vi akana či mai san godiaver? ₁₇Či hatiardian tume ke sogodi xan žial ande le pořa, porme musai t'anklel avri? ₁₈Numa so anklel anda o mui avel anda o ilo, ai kudo si kai mahril le manušes. ₁₉Ke si anda o ilo ke aven le nasul ginduri, le mudarimata, le kurvimata, le lažaimata, le čorimata, le xoxaimata ai le pupuimata. ₂₀Eta le dieli kai mahrin le manušes; numa te xas bi te xalaves le vast, či mahril le manušes.

₂₁O Jesus, gelotar kothar, gelo ande e phuv e Tira ai o Sidon. ₂₂Ai eta, jekh žiuvli anda o Kanan, kai avelas anda kudia rig, tsipil pe leste: T'avel tuke mila mandar, Baria, Šiav katar o David! muři šei si pria but mardi katar o demono.

₂₃Vo či dias la palpale či jekh vorba ai leske vortača pašile ai phenen leske zorasa: Trade la, ke voi tsipil pala amende.

₂₄Vo del palpale: Me sim tradino ferdi pala le bakroře xasarde katar o kher anda o Israel.

₂₅Numa voi avili te del čanga angla leste, phenelas: Baria, ažutisar ma!

₂₆Vo del palpale: Nai mišto te len o manřo katar le šiavoře, ai te šiuden les ka le tsinoře žiukel.

₂₇Ei, Baria, phenel voi, numa le tsinoře žiukel xan le kotorořa kai peren pa e skafidi lenge birevongi.

₂₈Atunči o Jesus phenel lake: Žiuvlio, tjiro patiamos si baro; t'avel tuke sar tu kames.

Ai, ande kudo časo, laki šei sastili.

₂₉O Jesus gelotar anda kudo than ai avilo paša e maria anda e Galilea. Anklisto pe o plai, vo bešel tele. ₃₀Atunči pašilias paša leste jekh baro narodo, sas lensa bange, koře, mutsi, langane, ai but aver nasvale. Thode le ka leske punře ai vo sastiardias len; ₃₁kadia ke o narodo sas lenge drago ke dikhen ke le mutsi den duma, ke le langane sas saste, ke le bange phiren, ke le koře dikhen ai o narodo vestil le Devles anda o Israel.

₃₂O Jesus, akhardias peske vortakon, phenel: Mange si but mila anda kado narodo; ke eta trin dies kai von si paša mande, ai von či xale khanči. Me či kamav te tradav le bokhale, daratar ke či mai avela le zor pe e vurma. ₃₃Le vortača phende leske: Sar šai lasa ame ande kado than pusto dosta te pravaras jekh kasavo baro narodo?

₃₄O Jesus pušel lendar: Sode si tumen manře?

Efta, den von palpale, ai uni tsinoře maše.

₃₅Atunči vo thodias te bešel o narodo pe e phuv, ₃₆lias le efta manře ai le maše, řudjisardias, phaglias le ai dias le ka peske vortača te den le ka o narodo. ₃₇Sa xale ai pravardile, ai andine efta košnitsi pherde kotora kai ašile. ₃₈Kudala kai xale sas štar mii manuš, bi t'aven gjinde le žiuvlia ai le šiavoře. ₃₉Atunči, vo tradias o narodo, anklisto ande o čuno, ai gelo ande e rig o Magadan.