Matei 16

₁Le Farizianuri ai le Sadusenuri astarde le Jesus, ai te zumaven les, mangel lestar te dikhen jekh semno t'avel katar o čeri. ₂O Jesus del le palpale: [E riat, tume phenen: Avela laši vramia, ke o čeri si lolo: ₃Ai diminiats: Si t'avel brišin adies, ke o čeri si jekh lolo tamlo. Tume žianen sar si o čeri, ai tume naštin te den p'o gor sar avela e vramia.] ₄Jekh vitsa nasul ai kai dias rigate le Devles mangel jekh čudenia, či avela lake dini kaver čudenia ferdi kudo katar o Jonas.

Porme vo muklias le, ai gelotar.

₅Le vortača, kana nakhle pe e kaver rig, busterde te len manře. ₆O Jesus phenel lenge: Arakhen tume katar e drosda le Farizianongi ai le Sadusenongi.

₇Le vortača den duma maškar pende, ai phenen: Ke pala ke ame či liam manře, phenel kadia.

₈O Jesus, žianglias, phenel: Sostar den tume godji ande tumende, žene kai si tume tsiřa patiamos, ke tume či lian manře? ₉Mai san tume bi-godiake, ai či den tume godji anda le panž manře ai le panž mii manuš ai sode košnitsi tume andian, ₁₀či anda le efta manře ai le štar mii manuš ai sode košnitsi tume andian? ₁₁Sar tume či hatiaren ke me či dem duma pa o manřo? Len tume sama katar e drosda le Farizianongi ai le Sadusenongi.

₁₂Atunči von hatiarde ke nai anda e drosda le manřeski ke vo phendias te len pe sama, numa anda so sikiaren le Farizianuri ai le Sadusenuri.

₁₃O Jesus, areslo ande e phuv katar o Tsesarea anda o Filipo mangel katar peske vortača: So phenen le manuš ke me sim, me, o Šiav katar o manuš?

₁₄Von den palpale: Uni phenen ke tu san o Jono kai boldias; le kaver, o Elia; le kaver, o Jeremia, vai jekh anda le profeturi.

₁₅Ai tume, phenel lenge vo, so phenen tume ke me sim?

₁₆O Simon Petri del palpale: Tu san o Kristo, o Šiav le Devlesko le živinde.

₁₇O Jesus, mai lias e vorba, phenel leske: Tu san veselo, Simon, šiav katar o Jonas; ke nai o mas ai o rat ke sikade tuke kadia, numa muřo dad kai si ande o čeri. ₁₈Ai me, phenav tuke ke tu san o Petri (o bař), ai ke pe kudo bař me vazdava muři khangeri, ai ke e martia naštila te kerel khanči lake. ₁₉Me dava tu le kjei le themeske anda o čeri; so tu phandesa pe e phuv avela phanglo ande o čeri, ai so tu putresa pe e phuv avela puterdo ande o čeri.

₂₀Atunči dias poronka ka le vortača te na phenen khanikaske ke vo si o Kristo.

₂₁De atunčiara o Jesus lias te kerel te žianen leske vortača ke trubul te žial ande o Jerusalem, ke kjinuila but katar le purane, katar le mai bare raša židovitsko ai katar le zakonaria, ke mudarena les, ai ke vo živindila o trito dies.

₂₂O Petri, lias les rigate, te xal pe lesa: Nai drago le Devleske, Baria! Či avela kudia.

₂₃Numa o Jesus, amboldinisailo, phenel ka o Petri: Palpale mandar, Satan! tu thos ma te perav; ke tjire ginduri nai le ginduri le Devleske, numa kudala le manušenge.

₂₄Atunči o Jesus phenel peske vortakonge: Te si varekon kai kamel t'avel pala mande, te bustrel pe pes, ke te lel pesko trušul, ai t'avel mansa. ₂₅Ke kuda kai kamela te skipil pesko traio xasarela les, numa kudo kai xasarela les pala mande arakhela les. ₂₆Ai so avela jekhe manušeske te nirila sa e lumia, te xasarela pesko duxo? Vai, pe soste šai o manuš te pařuvel pesko traio? ₂₇Ke o Šiav le manušesko trubul t'avel ande o barimos peske Dadesko, peske andželonsa; ai atunči vo dela sakones sar kudo kerdias. ₂₈Me phenav tumenge čačimasa, uni kai si kathe anda tumende či merena, žikin či dikhena le Šiaves le manušeske t'avel ande peski amperetsia.