Matei 17

₁Šov dies pala kudia, o Jesus lias pesa le Petri, le Jakob ai le Jono, lesko phral, ai ningerdias le rigate pe jekh baro plai. ₂Vo pařudinisailo angla lende; lesko mui strefialas sar o kham, ai leske tsalia aresle parne sar e vedaria. ₃Ai eta, o Moše ai o Elia sikadile, den duma lesa. ₄O Petri, lias e vorba, phenel ka o Jesus: Baria, si mišto ke ame sam kathe. Te tu kamesa, me thava kathe trin tseři, jekh tuke, jekh le Mošeske, ai jekh le Eliaske.

₅Sar vo mai delas duma, jekh nuvero strefial, garavel le. Ai eta, jekh hango ašundiol anda o nuvero, phenel kakala vorbi: Kado si muřo šiav kai si mange drago, ai ande kaste me thodem sa so si mange drago: Ašunen leste.

₆Kana von ašunde kudo hango, le vortača pele pe pengi fatsa, ai lias len jekh bari dar. ₇Numa o Jesus, pašilo, asbadias le, ai phenel: Ušten, na daran!

₈Von vazde le jakha, ai dikhle ferdi le Jesus.

₉Sar von vulenas pa o plai, o Jesus del len kadia ordina: Na den duma khanikaske so dikhlian, žikin či o Šiav le manušesko živindila katar le mule.

₁₀Le vortača pušle les kadia: Sostar le zakonaria phenen von ke o Elia trubul t'avel o mai angluno?

₁₁Vo del palpale: Čačes si ke o Elia trubul t'avel, ai te thol sa le dieli sar sas. ₁₂Numa me phenav tumenge ke o Elia avilo vuže, ai ke von či prinžiarde les, ai ke von kerde anda leste sar von kamle. Sa kadia o Šiav le manušesko kjinuila pala lende.

₁₃Le vortača hatiarde atunči ke vo delas duma lensa pa o Jono kai boldias.

₁₄Kana von aresle paša o narodo, jekh manuš avilo te del čanga angla o Jesus, ai phenel: ₁₅Baria, t'avel tuke mila anda muřo šiav, kai si bengailo, ai kai kjinuil pria but; vo butivar perel ande e jag, ai butivar ande o pai. ₁₆Me andem les ka tjire vortača, ai naštisarde te sastiaren les.

₁₇Vitsa kai či patial ai nasul, del palpale o Jesus, ži kana avava me tumensa? Ži kana ninkerava me tumen? Anen les mange kathe.

₁₈O Jesus del duma zurales ka o demono, kai anklisto anda o šiavořo avri, ai sastilo ka kudo časo.

₁₉Atunči le vortača pašile paša o Jesus, ai phende leske rigate: Sostar naštisardiam te gonisaras kudale demonos?

₂₀Si pala ke tume patian tsiřa, phenel lenge o Jesus. Me phenav tumenge čačimasa, t'avela tumen patiamos sar jekh simintsa garčitsaki, tume phenena kakale plaieske: Žiatar kathar, ai vo žialatar; khanči či avela te na keren. ₂₁Numa kasavo demono či anklela avri ferdi ke katar o řudjimos ai katar o postimos.

₂₂Kana von nakhen pa e Galilea, o Jesus phenel lenge: O Šiav le manušesko trubul t'avel dino ande le vast le manušenge. ₂₃Von mudarena les, ai o trito dies vo živindila.

Len lias le but mila.

₂₄Kana von aresle ande o Kapernaum, kudala kai lenas e taksa avile ka o Petri ai phenen leske: Tumaro birevo či pokjinel vo ka o templo le štar dinari?

₂₅Ei, phenel vo.

Ai kana von dine ande o kher, o Jesus arakhel le, ai phenel: So gindis tu, Simon? Le amperatsi la phuviake, kastar len von le taksi, katar penge šiave, vai katar le streia?

₂₆Vo phenel lenge: Katar le streia.

Ai o Jesus del le palpale: Le šiave či pokjinen. ₂₇Numa, te na rimosaras le, žia ka e maria, šiude e řai mašeski, ai tsirde o mai angluno mašio kai avela; puter lesko mui, ai tu arakhesa jekh teliari. Le les, ai de les te pokjines pe mande ai pe tute.